Amravati Reports First COVID-19 Case: अमरावती शहरात कोरोनाचा पहिला पॉझिटिव्ह रुग्ण आढळल्याने खळबळ उडाली आहे. महापालिका क्षेत्रातील 56 वर्षीय महिलेला कोरोनाची लागण झाल्याचे निष्पन्न झाले. या महिलेला श्वास घेण्यास त्रास होत असल्याने तपासणी करण्यात आली, ज्यामध्ये ती पॉझिटिव्ह आढळली. सध्या तिच्यावर गृहविलगीकरणात उपचार सुरू आहेत. आरोग्य विभाग आणि महानगरपालिकेचे पथक या महिलेच्या कुटुंबीयांच्या संपर्कात आहे. कोरोनाच्या संभावित लाटेचा धोका टाळण्यासाठी जिल्हा सामान्य रुग्णालयात कोरोना चाचणीची सुविधा उपलब्ध करून देण्यात आली आहे. तसेच, रुग्णालयात दहा खाटांचा स्वतंत्र कोरोना वार्ड तयार करण्यात आला आहे. जिल्हा शल्य चिकित्सक डॉ. दिलीप सौंदळे यांनी ही माहिती दिली. शहरवासीयांना सतर्क राहण्याचे आणि आवश्यक खबरदारी घेण्याचे आवाहन प्रशासनाने केले आहे.