पुणे: आंबेगाव तालुक्यात पुन्हा एकदा बिबट्यांचा धुमाकूळ सुरू झाला असून कवलीमळा आणि अवसरी खुर्द परिसरातील नागरिकांमध्ये भीतीचे वातावरण निर्माण झाले आहे. रात्री तीनच्या सुमारास रवींद्र वाळके यांच्या घराच्या आवारात तब्बल तीन बिबट्यांनी प्रवेश केला. नवीन घराच्या पोर्चमध्ये आणि जुन्या घरासमोर सुमारे दोन ते तीन मिनिटे थांबून हे बिबटे परत निघून गेले. या भागात यापूर्वीही बिबट्यांचा वावर होता, मात्र आता परिस्थिती अधिक गंभीर झाल्याचे स्थानिकांचे म्हणणे आहे. गेल्या काही दिवसांत कवलीमळा परिसरात एकही कुत्रा शिल्लक नसल्याची माहिती मिळते, तर दोन ते तीन महिन्यांपूर्वी भरत वसंत भोर यांच्या वासरावरही हल्ला झाला होता.