राज्यातील 30 एमआयडीसी रिसॉर्टच्या इमारती आणि मोकळ्या जमिनी बिल्डरांच्या घशात घालण्याचा डाव असल्याचा आरोप विरोधी पक्ष नेते अंबादास दानवे यांनी केला आहे. भारतीय जनता पक्षाचे प्रदेशाध्यक्ष चंद्रशेखर बावनकुळे अध्यक्ष असलेल्या संस्थेला अत्यल्प दरात भूखंड देण्याचे प्रकरण अजूनही ताजे आहे. असे असतानाच अंबादास दानवे यांनी राज्य सरकारवर हा दुसरा गंभीर आरोप केला आहे. या संदर्भातील यादीच त्यांनी जाहीर केली आहे. यासंदर्भातील एक ट्विट त्यांनी आपल्या सोशल मिडियावरून शेअर केलं आहे.

या संदर्भात अंबादास दानवे यांनी शेअर केलेल्या पोस्टमध्ये राज्य सरकार आणि मंत्री गिरीश महाजन यांच्यावर निशाणा साधला आहे. या खासगीकरणामुळे एकूण 200 मराठी अधिकारी - कर्मचारी यांच्या नोकऱ्या शासन खाणार असल्याचा आरोप देखील त्यांनी केला आहे. जागतिक पर्यटन दिनीच भूखंड माफियांना सरकारने देऊ केलेले हे दिवाळीचे फटाके असल्याचा आरोप देखील दानवे यांनी आपल्या पोस्टमध्ये केला आहे.