बीड : शिरूर तालुक्यातील खोकर मोहा गावातील महिलांनी उपमुख्यमंत्री अजित पवार यांच्या भेटीदरम्यान रस्त्याचा प्रश्न थेट त्यांच्या समोर मांडला. गावात अनेक वर्षांपासून रस्ता नसल्यामुळे नागरिकांना प्रचंड हालअपेष्टा सहन कराव्या लागत आहेत.

अजित पवार गावात आल्यानंतर महिलांनी त्यांना घेराव घालत तात्काळ रस्ता करून देण्याची मागणी केली. पवारांनी निवेदन स्वीकारत महिलांना विचारलं की, “लाडकी बहिण योजनेचा लाभ तुम्हाला मिळतो का?” यावर महिलांनी ठामपणे उत्तर दिलं, आम्हाला लाडकी बहीण योजनेपेक्षा रस्ता हवा आहे.

यावर पवारांनी मिश्किल टिपणी करत विचारलं, “मग लाडकी बहीण बंद करू का?” यामुळे उपस्थित ठिकाणी एकच हास्यकल्लोळ झाला. मात्र लगेचच त्यांनी गंभीर होत अधिकाऱ्यांना खडे बोल सुनावले आणि “तात्काळ गावात रस्ता झाला पाहिजे” अशा स्पष्ट सूचना दिल्या. तो रस्ता आता किती दिवसात होतो हे पाहण महत्वाचे ठरणार आहे.