राज्याचे उपमुख्यमंत्री अजित पवार यांनी पुन्हा एकदा बारामती विधानसभा मतदारसंघातून माघार घेणार असल्याचे स्पष्ट संकेत दिले आहेत. बारामतीमध्ये बूथ कमिटी कार्यकर्ता मेळाव्यात बोलत असताना अजित पवारांनी कार्यकर्त्यांना भावनिक आवाहन केलं. यंदाच्या वेळेस मी जो उमेदवार देईल त्याला तुम्ही निवडून आणायचं आहे. तो कसा निवडून द्यायचा आहे, ते तुम्ही ठरवायचं आहे, असं अजित पवार म्हणाले. अजित पवार यांनी मेळाव्यात केलेल्या वक्तव्यावर शरद पवार यांच्याकडे प्रसारमाध्यमांच्या प्रतिनिधींनी विचारणा केली असता, ते अजून पुनरावृत्ती करणार आहेत का, असा खोचक टोला शरद पवार यांनी अजित पवार यांना लगावला. दरम्यान, अजित पवार नेमकी कुणाला उमेदवारी देणार? लोकसभा निवडणुकीप्रमाणे यंदाच्या विधानसभा निवडणुकीतही पवार विरुद्ध पवार असा सामना रंगणार का? याबाबत राजकीय वर्तुळात अनेक प्रश्न उपस्थित केले जात आहेत.