Ajit Pawar : 'महायुतीच्या नीट बातम्या द्या नाहीतर सगळ्यांना आम्ही दोघे उडवून टाकू', अशी मिश्किल टिप्पणी उपमुख्यमंत्री अजित पवार यांनी केली आहे.

आज पिंपरी चिंचवडमध्ये मुख्यमंत्री देवेंद्र फडणवीस आणि उपमुख्यमंत्री अजित पवार यांच्या हस्ते अनेक विकास कामांचे उद्घाटन करण्यात आले होते. यादरम्यान त्यांनी चाकणच्या निबे उद्योग समूहाला भेट दिली. तेव्हा देवेंद्र फडणवीस आणि अजित पवार या दोघांनीही हातांमध्ये एके ४७ बंदूका घेतल्या. तेव्हा मुख्यमंत्र्यांनी बंदूकीने नेम लावण्याचा प्रयत्न केला. तर अजित पवारांनी जमलेल्या पत्रकारांकडे बंदूक धरली आणि 'महायुतीच्या नीट बातम्या द्या नाहीतर एकेकाला आम्ही दोघे उडवू' असे अजित पवार मिश्किलपणे म्हणाले. त्यांच्या या विधानाने तेथे जमलेले सर्वजण मोठ्याने हसले. त्यानंतर हसत हसत पवार यांनी 'आता हे पत्रकार एवढंच छापणार' असे विधान देखील केले.