मराठीचा मुद्दा आणि महापालिकेच्या निवडणुकी दरम्यान ठाकरे बंधू एकत्र आल्याने राजकीय वर्तुळात पहिल्यांदाच एक वेगळे चित्र पाहायला मिळाले होते. राज आणि उद्धव ठाकरे यांच्यातील वाढत्या भेटीगाठीने ठाकरे कुटुंबातील ओलावा हा वाढतच गेला. अशातच आदित्य आणि अमित ठाकरे यांच्यातील देखील बंधूभाव अधिकच वाढत आहे. आशातच आज अमित ठाकरे यांच्या वाढदिवस आहे. यानिमित्ताने आज आदित्य ठाकरे अमित ठाकरे यांना शुभेच्छा देण्यासाठी शिवतीर्थ निवासस्थानी पोहोचले. शिवतीर्थ येथे झालेल्या या भेटीत दोन्ही नेत्यांनी गळाभेट घेतली. या भेटीमुळे केवळ कौटुंबिक नव्हे, तर राजकीय स्तरावरही विविध चर्चांना सुरुवात झाली आहे. दरम्यान, या भेटीचे फोटो आणि व्हिडिओ सोशल मीडियावर मोठ्या प्रमाणात व्हायरल होत असून, त्यावर विविध प्रतिक्रिया उमटत आहेत.