राज्यातील २९ महापालिकांच्या निवडणुकीसाठी १५ जानेवारीला मतदान, तर १६ जानेवारीला मतमोजणी होणार आहे. २ जानेवारीला अर्थात काल शुक्रवारी उमेदवारी अर्ज माघारीची अंतिम मुदत होती. या दिवशी अनेक ठिकाणी उमेदवारांनी अर्ज मागे घेतले आहेत. मात्र, आतापर्यंत राज्यभरात महायुतीचे ६५ उमेदवार बिनविरोध निवडून आले आहेत. याबाबत आता शंका उपस्थित केली जात आहे. यापूर्वी एखाद-दुसरा उमेदवार बिनविरोध निवडून येत होता, पण यावेळी दबाव टाकल्यानं अनेकांनी उमेदवारी अर्ज मागे घेतले, असा आरोप विरोधकांकडून केला जात आहे. मनसेनं तर अर्ज मागे घेण्यासाठी संबंधित उमेदवारांना पाच - पाच कोटी दिल्याचा आरोप केला आहे. दुसरीकडे उमेदवारांनी अर्ज का मागे घेतले, याचे पुरावे आमच्याकडे आहेत, असा दावा मनसेने केला आहे.

राज्यातील पालिका निवडणुकीत बिनविरोध निवडून आलेल्या ६५ उमेदवारांविरोधात आता मनसे कोर्टात धाव घेणार आहे. येत्या ५ जानेवारीला कोर्टात जाणार आहे. ठाणे, कल्याण डोंबिवलीसह राज्यात निवडून आलेल्या महायुतीच्या ६५ उमेदवारांच्या विरोधात राज ठाकरे यांच्याकडे पुरावे आहेत. येणाऱ्या सभांच्या माध्यमातून राज ठाकरे उमेदवारांची पोलखोल करणार आहेत. कॉल रेकॉर्ड, व्हिडिओ यांच्यासह अनेक महत्त्वाचे पुरावे राज ठाकरे यांच्याकडे नेत्यांनी दिल्याचे सांगण्यात आले आहे.