भंडाऱ्यामध्ये गणपती विसर्जन मिरवणुकीदरम्यान मोठी दुर्घटना घडली. मिरवणूक बघताना इमारतीचे छत अचानक कोसळले. या घटनेमध्ये ३० ते ४० महिला जखमी झाल्या आहेत. या महिला किरकोळ जखमी झाल्या असून उपचार करून त्यांना घरी सोडण्यात आले. या घटनेचा थरारक व्हिडीओ समोर आला असून तो सोशल मीडियावर व्हायरल होत आहे.

गणपती विसर्जन मिरवणूक बघण्यासाठी या सर्व महिला जीर्ण इमारतीवर चढल्या होत्या. त्यावेळी अचानक जीर्ण इमारतीचे छत कोसले. ही घटना लाखांदूर तालुक्यातील बारव्हा येथे घडली. या घटनेत ३० ते ४० महिला असून त्यांना किरकोळ मार लागला आहे. बारव्हा पेठ येथे सार्वजनिक गणेश उत्सव मंडळाचे वतीने गणेश उत्सव मोठ्या धुमधडाक्यात साजरा करण्यात आला. १० दिवस विविधरंगी कार्यक्रम साजरे करण्यात आले.

गणरायाच्या विसर्जनासाठी डीजे, विविधरंगी झाकी आणि लेझीमच्या तालावर गणेशभक्त नाचत होते. ही मिरवणूक पाहण्यासाठी काही महिला जीर्ण इमारतीवर चढल्या होत्या. त्याचवेळी अचानक जीर्ण इमारतीचे छत कोसळले. टिनाचे शेडखाली अनेक महिला उभ्या होत्या. त्यांच्यावर टिनाचे शेड कोसळले. मात्र सिमेंटचे छताखाली टिनाचे शेड असल्यामुळे नऊ महिला किरकोळ जखमी झाल्या. तात्काळ जमावाने सर्व टिनाचे शेडच उचलून धरले आणि जखमींना तात्काळ उपचारासाठी प्राथमिक आरोग्य केंद्र बारव्हा येथे दाखल करण्यात आले. जखमींवर उपचार करून त्यांना घरी सोडण्यात आले आहे.