मोहोळ नगरपरिषद निवडणुकीत एक ऐतिहासिक निकाल समोर आला असून अवघ्या 22 वर्षांच्या सिद्धी वस्त्रे यांनी दणदणीत विजय मिळवत राजकारणात नवा अध्याय लिहिला आहे. अत्यंत कमी वयात मिळवलेल्या या यशामुळे मोहोळच्या राजकीय वर्तुळात मोठी चर्चा रंगली आहे. या निवडणुकीत मतदारांनी तरुण नेतृत्वावर विश्वास दाखवत सिद्धी वस्त्रे यांना स्पष्ट कौल दिला आहे. त्यांच्या विजयामुळे मोहोळ शहरात आनंदाचे व उत्साहाचे वातावरण पाहायला मिळत असून निकाल जाहीर होताच समर्थक रस्त्यावर उतरले. फटाक्यांची आतषबाजी, घोषणाबाजी आणि गुलाल उधळून कार्यकर्त्यांनी जल्लोष साजरा केला. सिद्धी वस्त्रे यांचा हा विजय तरुण पिढीसाठी प्रेरणादायी मानला जात आहे. कमी वय असूनही जनतेशी थेट संवाद, स्थानिक प्रश्नांची जाण आणि सकारात्मक प्रचाराच्या जोरावर त्यांनी मतदारांची मने जिंकली. विशेषतः महिला आणि युवकांमध्ये त्यांच्या विजयाचे स्वागत होत आहे.