जळगावात महाजनांना शह देण्यासाठी शिवसेनेने खडसेंना पक्षात घेण्याची तयारी केलीय. तर राष्ट्रवादीनेही खडसेंसाठी गळ टाकल्याने खडसेंसमोर संभ्रम निर्माण झालाय.

सध्या भाजपमध्ये नाराज असलेल्या खडसेंनी पक्षबदलाचे संकेत दिलेत. मात्र तूर्तास तरी पक्ष सोडणार नसल्याचं सांगत त्यांनी आपल्या भूमिकेबाबतचा संभ्रमही कायम ठेवलाय. त्यामुळे एकिकडे राष्ट्रवादी तर दुसरीकडे शिवसेनेनेही खडसेंना आपल्या पक्षात खेचण्यासाठी गळ टाकून ठेवलाय. 

उत्तर महाराष्ट्रात सध्या भाजपचं वर्चस्व आहे. सध्या खडसेंना डावलून भाजप नेतृत्वाने गिरीश महाजनांना बळ दिलंय. मात्र तरीही या पट्ट्यात अजूनही एकनाथ खडसे आपला राजकीय प्रभाव राखून आहेत.
त्यातच खडसे आणि महाजन यांच्यातील वैर सर्वश्रूत आहे. त्यामुळे खडसेंचा वापर करून उत्तर महाराष्ट्रात आपला पक्ष मजबूत करण्याचे शिवसेना आणि राष्ट्रवादीचे मनसूबे आहेत. 

नुकत्याच झालेल्या विधानसभा निवडणुकीत शिवसेनेच्या उमेदवारांविरोधात गिरीश महाजनांनी बंडखोर उभे केल्याने पराभव झाल्याची शिवसेनेची भावना आहे. त्यामुळे खडसेंना बळ देत महाजनांची खोड मोडण्याची शिवसैनिकांची इच्छा आहे. आता पाहायचं एवढंच की महाजनांना शह देण्यासाठी खडसे नेमकी कुठल्या पक्षाची वाट निवडतात.

Web Title -  shivsena, Ncp and Congress want Eknath Khadse in  North Maharashtra for party expansion