Yash Dayal Out Of IPL 2026 : इंडियन प्रीमिअर लीग अर्थात आयपीएल स्पर्धा २८ मार्चपासून सुरू होणार आहे. जगातील सर्वात श्रीमंत असलेली आयपीएल स्पर्धा सुरू होण्याआधीच गतविजेता रॉयल चॅलेंजर्स बेंगळुरू संघाला मोठा झटका बसला आहे. संघाचा वेगवान गोलंदाज यश दयाल संपूर्ण स्पर्धा खेळणार नाही. आरसीबी (RCB) संघाचे डायरेक्टर मो बोबाट यासंदर्भात माहिती दिली.

याआधीही आरसीबी संघाला जोश हेजलवुड याच्या रुपाने मोठा हादरा बसला होता. हेजलवुड हा सुरुवातीचे काही सामने खेळू शकणार नाही.

रॉयल चॅलेंजर्स बेंगळुरू संघाची गोलंदाजी कमकुवत होत असल्यानं चिंता वाढली आहे. आरसीबी संघाचे डायरेक्टर मो बोबाट यांनी यश दयालबाबत महत्वाची माहिती दिली. आरसीबीसाठी यश दयाल या पर्वात खेळू शकणार नाही. काही वैयक्तिक कारणांमुळं त्यानं हा निर्णय घेतला आहे. संघानं अद्याप त्याच्या जागी कोणत्याही खेळाडूची निवड केलेली नाही. आता दयालच्या जागी कोणत्या खेळाडूला संधी मिळते, याची उत्सुकता आहे. यश दयाल यानं मागील पर्वात खेळताना चांगली गोलंदाजी केली होती. मागील पर्वात त्याने आरसीबीसाठी खेळताना १३ विकेट घेतल्या होत्या.

यश दयाल अलीकडच्या काळात बऱ्याच घटनांमुळं चर्चेत होता. यंदाची आयपीएल स्पर्धा सुरू होण्यास काही दिवसच शिल्लक आहेत. पण तो आरसीबी संघाच्या ट्रेनिंग कॅम्पमध्येही सहभागी झाला नाही. त्यामुळं तो यंदा आयपीएल स्पर्धा खेळणार का, असा प्रश्न उपस्थित करण्यात येत होता. या चर्चांना संघाच्या डायरेक्टर बोबाट यांनी पूर्णविराम दिला आहे.

यश यंदा संघात सहभागी होऊ शकणार नाही, असं त्यांनी स्पष्ट केलं. यश सध्या काही वैयक्तिक कारणांमुळं वेगळ्याच परिस्थितीतून जात आहे. यशला आमचा कायम पाठिंबा होता. जेव्हा आमच्याकडे खेळाडूंना रिटेन किंवा रिलीज करण्याची संधी होती, तेव्हा आम्ही यशला रिटेन केलं. आम्ही त्याच्या सातत्याने संपर्कात आहोत. त्याच्यासोबत आज देखील चर्चा केली, असं बोबाट म्हणाले.