भारत आणि दक्षिण आफ्रिका या दोन्ही संघांमध्ये टी-२० मालिकेचा थरार सुरु आहे. ही मालिका झाल्यानंतर भारत आणि ऑस्ट्रेलिया या दोन्ही संघांमध्ये बॉर्डर गावसकर मालिका सुरु होणार आहे.

या मालिकेपूर्वी भारताचा हेड कोच गौतम गंभीरने मुंबईत पत्रकार परिषदेत सहभाग घेतला होता. या पत्रकार परिषदेत बोलताना त्याने रिकी पाँटींगची बोलती करणारं वक्तव्य केलं आहे.

नेमकं प्रकरण काय?

ऑस्ट्रेलियाचा माजी क्रिकेटपटू रिकी पाँटींगने आयसीसी रिव्ह्यूमध्ये बोलताना रोहित शर्मा आणि विराट कोहलीच्या फॉर्मवर प्रश्नचिन्ह उपस्थित केले होते. रिकी पाँटींग म्हणाला होता की, 'मी काही दिवसांपूर्वी विराटची आकडेवारी पाहीली, त्यात असं लिहीलं होतं की, विराटने गेल्या ५ वर्षांत केवळ २ (तीन) शतकं झळकावली आहेत. हे पाहून मला मुळीच ठीक वाटलं नाही. म्हणजे, ही चिंतेची बाब आहे.

याबाबत बोलताना गंभीर म्हणाला की, 'पाँटींगला लुडबुड करायची काय गरज..? मला तरी हेच वाटतं की, त्याने ऑस्ट्रेलियन क्रिकेटचा विचार करावा. मला विराट आणि रोहितची चिंता नाही.' यासह गौतम गंभीर विराट कोहली आणि रोहित शर्माला समर्थन करताना दिसून आला आहे. बॉर्डर गावसकर ट्रॉफीला येत्या २२ नोव्हेंबरपासून सुरुवात होणार आहे. या मालिकेसाठी भारतीय संघातील खेळाडू लवकरच ऑस्ट्रेलियाला रवाना होणार आहेत.

या मालिकेसाठी असा आहे भारतीय संघ:

रोहित शर्मा (कर्णधार), जसप्रीत बुमराह (उप-कर्णधार), यशस्वी जयस्वाल, अभिमन्यु ईश्वरन, शुभमन गिल, विराट कोहली, केएल राहुल, रिषभ पंत, सरफराज खान, ध्रुव जुरेल, आर अश्विन, रविंद्र जडेजा, मोहम्मद सिराज, आकाश दीप, प्रसिद्ध कृष्णा, हर्षित राणा, नितीश कुमार रेड्डी, वॉशिंग्टन सुंदर.

राखीव खेळाडू: मुकेश कुमार, नवदीप सैनी, खलील अहमद.