आयपीएल २०२५ ची धूमधाम सुरु आहे. उद्या चिन्नास्वामी स्टेडियममध्ये रॉयल चॅलेंजर्स बंगळुरू आणि गुजरात टायटन्स हा सामना खेळला जाणार आहे. घरच्या स्टेडियममध्ये खेळत असल्याने हा सामना आरसीबी फॅन्ससाठी खास असणार आहे. पण त्याहीपेक्षा पहिल्यांदा मोहम्मद सिराज आरसीबीच्या विरोधात खेळत असल्याने या सामन्याची चर्चा आहे.

२०१७ मध्ये सनरायजर्स हैदराबादच्या माध्यमातून मोहम्मद सिराजने आयपीएलमध्ये पदार्पण केले होते. २०१८ मध्ये मोहम्मद सिराज रॉयल चॅलेंजर्स बंगळुरूमध्ये सहभागी झाला होता. २०१८ ते २०२४ या कालावधीत त्याने गोलंदाजीच्या माध्यमातून योगदान दिले होते. खासकरुन विराट कोहलीसोबत त्याचे खास नाते तयार झाले होते. मागच्या वर्षी आरसीबीने सिराजला रिलीज केले होते. आयपीएल मेगा ऑक्शनमध्ये गुजरातने सर्वाधिक बोली लावून सिराजला संघात सामील केले होते.

रॉयल चॅलेंजर्स बंगळुरू विरुद्ध गुजरात टायटन्स हा सामना उद्या चिन्नास्वामी स्टेडियमवर खेळला जाईल. २०१८ नंतर पहिल्यांदाच सिराज बंगळुरूच्या विरोधात खेळणार आहे. यामुळे उद्याच्या सामन्याची सोशल मीडियावर चर्चा आहे. अशातच विराट कोहली आणि मोहम्मद सिराजचा व्हिडीओ सोशल मीडियावर व्हायरल होत आहे. या व्हिडीओमध्ये विराट आणि सिराज एकमेकांना मिठी मारत असल्याचे दिसते. त्यांच्यातील बॉडिंग व्हिडीओत पाहायला मिळत आहे.

आरसीबीने आयपीएल २०२५ मधील दोन्ही सामने जिंकले आहेत. पहिल्या सामन्यात गतविजेते केकेआर आणि दुसऱ्या सामन्यात सीएसकेचा आरसीबीने पराभव केला आहे. तर दुसऱ्या बाजूला गुजरातने पंजाबविरुद्धचा गमावला, त्यानंतर मुंबईच्या सामन्यामध्ये गुजरात टायटन्सने कमबॅक केले. उद्याचा सामना कोणता संघ जिंकेल याकडे सर्व चाहत्यांचे लक्ष लागले आहे.