Virat Kohli Hugged Rohit Sharma:

भारत आणि श्रीलंका या दोन्ही संघांमध्ये सुपर ४ फेरीतील सामना पार पडला. या रोमांचक सामन्यात भारतीय संघाने दमदार खेळ करत ४१ धावांनी विजय मिळवला आहे. यासह भारतीय संघाने आशिया चषकाच्या अंतिम फेरीचं तिकीट मिळवलं आहे.

या सामन्यात भारतीय संघाचा कर्णधार रोहित शर्माने फलंदाजी करताना ५३ धावांची खेळी केली. तर धावांचा बचाव करताना त्याने जीव ओतून क्षेत्ररक्षण केलं. यादरम्यान त्याने स्लीपमध्ये क्षेत्ररक्षण करताना भन्नाट झेल टिपला आहे.

हा झेल टिपल्यानंतर विराट कोहलीने विराट कोहलीला मिठी मारली आहे. ज्याचा व्हिडिओ सध्या सोशल मीडियावर जोरदार व्हायरल होत आहे.

तर झाले असे की, श्रीलंकेची फलंदाजी सुरू असताना २६ वे षटक टाकण्यासाठी रविंद्र जडेजा गोलंदाजीला आला होता. त्यावेळी दासून शनाका स्ट्राईकवर होता. या षटकातील पहिलाच चेंडू शनाकाच्या बॅटचा कडा घेत वेगाने स्लिपमध्ये असलेल्या रोहित शर्माच्या हातात गेला.

हा झेल टिपताच विराट धावत आला आणि त्याने रोहितला मिठी मारली. विराट आणि रोहितच्या ब्रोमान्सचा व्हिडिओ सध्या सोशल मीडियावर जोरदार व्हायरल होत आहे.

विराट कोहलीने रोहितला मिठी मारल्याचे फोटो आणि व्हिडिओ सध्या नेटकऱ्यांच लक्ष वेधून घेत आहे. विराट आणि रोहितच्या जोडीने क्रिकेट चाहत्यांना सुरेश रैना आणि युवराज सिंगची आठवण करून दिली आहे.

जेव्हा युवराज सिंग झेल टिपायचा त्यावेळी सुरेश रैना जिथे कुठे असायचा तरीदेखील धावत यायचा आणि युवराज सिंगला मिठी मारायचा. (Latest sports updates)

भारताचा जोरदार विजय..

तसेच या सामन्याबद्दल बोलायचं झालं तर भारतीय कर्णधार रोहित शर्माने या सामन्यात नाणेफेक जिंकून प्रथम फलंदाजीचा निर्णय घेतला होता. भारतीय संघाकडून डावाची सुरूवात करताना कर्णधार रोहित शर्माने सर्वाधिक ५३ धावांची खेळी केली.

तर केएल राहुलने ३९ आणि ईशान किशनने ३३ धावांचे योगदान दिले. भारतीय संघाने या डावात २१३ धावा केल्या.

तर या धावांचा पाठलाग करताना श्रीलंकेकडून धनंजय डी सिल्वाने ४१ आणि वेलालागेने नाबाद ४२ धावांची खेळी केली. मात्र या दोघांची खेळी व्यर्थ गेली, कारण श्रीलंकेचा संघ विजयापासून ४१ धावा दूर राहिला.