भारतीय फुटबॉल विश्वातील दिग्गज खेळाडू सुनील छेत्रीने आंतरराष्ट्रीय फुटबॉलला रामराम करण्याचा निर्णय घेतला आहे. ६ जून रोजी फिफा वर्ल्डकप पात्रता फेरीत तो भारतासाठी आपला शेवटचा सामना खेळण्यासाठी मैदानात उतरणार आहे. यासह त्याने आपल्या १९ वर्षांच्या कारकिर्दीला पूर्णविराम दिला आहे. त्याने सोशल मीडियावर भावुक करणारा व्हिडिओ शेअर करत निवृत्तीची घोषणा केली. दरम्यान या व्हिडिओवर भारताचा माजी कर्णधार विराट कोहलीने आपली प्रतिक्रिया दिली आहे.

काय म्हणाला विराट?

सुनील छेत्रीने गुरुवारी (१६ मे) निवृत्तीची घोषणा केली आहे. त्याने १० मिनिटांचा एक व्हिडिओ शेअर करत हा निर्णय सांगितला. या व्हिडिओवर लाखो चाहत्यांनी आपल्या प्रतिक्रिया दिल्या. मात्र विराट कोहलीची प्रतिक्रिया लक्षवेधी ठरली. त्याने प्रतिक्रिया देत, माझ्या भावा..मला अभिमान आहे..' असं लिहिलं आहे. विराट कोहलीसह बीसीसीआय, रॉयल चॅलेंजर्स बंगळुरू आणि अनेक दिग्गज खेळाडूंनी आपल्या प्रतिक्रिया दिल्या आहेत.

रेकॉर्ड ब्रेकर सुनील छेत्री

सुनील छेत्री हा भारताचा सर्वात यशस्वी फुटबॉलपटू आहे. त्याच्या नावे अनेक मोठ मोठ्या रेकॉर्डची नोंद आहे. आपल्या कारकीर्दीत त्याने १४५ सामने खेळले आहेत. यादरम्यान त्याने ९३ गोल केले आहेत. वर्तमानात तो तिसरा सर्वात यशस्वी फुटबॉलपटू आहे. या यादीत पहिल्या स्थानी ख्रिस्तियानो रोनाल्डो आणि लिओनेल मेस्सी यांचा समावेश आहे. तो या दोन्ही दिग्गज खेळाडूंनंतर सर्वाधिक गोल करणारा खेळाडू आहे. त्याने आपल्या व्हिडिओमध्ये १९ वर्षांच्या आठवणी सांगितल्या आहेत.