भारत आणि इंग्लंड या दोन्ही संघांमध्ये ५ टी -२० सामन्यांची मालिका सुरू आहे. मालिकेतील तिसरा सामना राजकोटमध्ये रंगणार आहे. मालिकेतील सुरुवातीच्या दोन्ही सामन्यांमध्ये भारतीय संघाने शानदार विजयाची नोंद केली आहे. या विजयासह भारतीय संघाने या मालिकेत २-० ने आघाडी घेतली आहे.

आता मालिकेतील तिसरा सामना जिंकून भारतीय संघ या मालिकेत विजयी आघाडी घेण्याच्या प्रयत्नात असणार आहे. या मालिकेसाठी मोहम्मद शमीचा संघात समावेश करण्यात आला आहे. मात्र सुरुवातीच्या दोन्ही सामन्यांमध्ये त्याला संधी देण्यात आलेली नाही. दरम्यान तिसऱ्या सामन्यात त्याला संधी मिळणार का? जाणून घ्या.

चेन्नईत झालेल्या दुसऱ्या टी -२० सामन्यात भारतीय संघात २ मोठे बदल करण्यात आले होते. वॉशिंग्टन सुंदर आणि ध्रुव जूरेलला प्लेइंग ११ मध्ये स्थान देण्यात आले होते. ध्रुव जूरेलला फलंदाजीत हवी तशी कामगिरी करता आली नव्हती. रिंकू सिंग दुखापतीमुळे या सामन्यातूनही बाहेर होणार आहे. त्यामुळे त्याच्या जागी अष्टपैलू खेळाडू रमनदीप सिंगला संधी दिली जाऊ शकते. तर नितीश रेड्डीच्या जागी शिवम दुबेचा समावेश केला जाऊ शकतो.

रमनदीप सिंगला दक्षिण आफ्रिकेविरुद्ध झालेल्या मालिकेत पदार्पण करण्याची संधी मिळाली होती. या संधीचा फायदा घेत त्याने शानदार फलंदाजी केली होती. तर शिवम दुबेला श्रीलंकेत आपला शेवटचा सामना खेळण्याची संधी मिळाली होती. या दोन्ही खेळाडूंना प्लेइंग ११ मध्ये स्थान दिले जाऊ शकते. त्यामुळे रवी बिश्नोई किंवा वॉशिंग्टन सुंदरला प्लेइंग ११ मधून बाहेर बसावं लागेल.

राजकोटमध्ये शमीला संधी मिळणार का?

भारताचा स्टार वेगवान गोलंदाज मोहम्मद शमीला संघात स्थान तर दिलं गेलं आहे. मात्र सुरुवातीच्या दोन्ही सामन्यांमध्ये त्याला प्लेइंग ११ मध्ये खेळण्याची संधी मिळालेली नाही. तिसऱ्या सामन्यातही त्याला संधी मिळण्याची शक्यता ही खूप कमी आहे. शमीचा चॅम्पियन्स ट्रॉफीसाठी भारतीय संघात समावेश करण्यात आला आहे. बुमराहच्या अनुपस्थितीत तो महत्वाची भूमिका बजावू शकतो. मात्र आता त्याचं मैदानावर न उतरणं हे भारतीय फॅन्सचं टेन्शन वाढवत आहे.