पॅरिस ऑलिम्पिक स्पर्धेच्या सहाव्या दिवशी महाराष्ट्राच्या स्वप्नील कुसाळेने ५० मीटर रायफल थ्री पोझिशनमध्ये भारताला पदक जिंकून दिलं. मनू भाकर हिच्यानंतर पॅरिसमध्ये नेमबाजीत पदक जिंकणारा तो दुसरा भारतीय ठरला. दरम्यान एकाच ऑलिम्पिकमध्ये नेमबाजीत ३ पदक जिंकण्याची ही भारताची पहिलीच वेळ आहे. तर १९५२ नंतर महाराष्ट्राला दुसऱ्यांदा ऑलिम्पिक पदक मिळालय. स्वप्नीलने महाराष्ट्राला दुसरं पदक मिळवून दिलंय.

यापूर्वी खाशाबा जाधव यांनी कुस्तीतील पहिले वैयक्तिक पदक जिंकले होतं. दरम्यान कांस्यपदक जिंकताच कुसाळे याचे नशीब चमकलंय. भारतीय रेल्वेने त्याच प्रमोशन केलं आहे. ऑलिम्पिक पदकानंतर त्याला बढती मिळाली आहे. पॅरिस ऑलिम्पिकमधील कामगिरीच्या आधारे कुसाळे याची मुंबईतील ओएसडी, स्पोर्ट्स सेल म्हणून ( OSD, Sports Cell in Mumbai) पदोन्नती करण्यात आली आहे. याची माहिती सीआरचे मुख्य जनसंपर्क अधिकारी स्वप्नील निला यांनी दिलीय.

पॅरिस ऑलिम्पिकमध्ये महाराष्ट्राचा नेमबाज स्वप्नील कुसाळेने 50 मीटर रायफल थ्री पोझिशनच्या प्रकारात कांस्यपदक पटकावलंय. त्याला 451.4 पॉईंट्स मिळाले. अवघ्या काही पॉइंट्सने रौप्यपदकाने त्याला हुलकावणी दिली. स्वप्नील कुसाळे हा महाराष्ट्रातील कोल्हापूर येथील कांबळवाडी गावातील आहे. स्वप्नीलचा जन्म 6 ऑगस्ट 1995 रोजी कोल्हापूरच्या राधानगरीमध्ये जन्म झाला. त्याचे वडील सुरेश शिक्षक तर आई अनिता कांबळवाडी गावच्या सरपंच आहेत.

स्वप्नीलने नाशिकच्या क्रीडा प्रबोधिनीतून नेमबाजीचे प्राथमिक धडे घेतले. त्यानंतर पुण्यातील बालेवाडीच्या क्रीडा प्रबोधिनीत पुढील सराव केला.2015 मध्ये झालेल्या आशियाई नेमबाजी चॅम्पियनशिपमध्ये कनिष्ठ गटात सुवर्णपदकाची कमाई केली होती. दरम्यान आपल्या कामगिरीबद्दल कुसाळे म्हणला, आतापर्यंतचा अनुभव खूप चांगला आहे. मला शूटिंग आवडते आणि मला खूप आनंद आहे की मी इतके दिवस ते करू शकलो. मनू भाकर यांना पाहिल्यानंतर माझा आत्मविश्वास वाढला. ती जिंकू शकली तर आपणही जिंकू शकतो.