आयपीएल २०२५ स्पर्धेची चर्चा रंगायला सुरु झाली आहे. या स्पर्धेसाठी येत्या नोव्हेंबर किंवा डिसेंबर महिन्यात मेगा ऑक्शन होणार असल्याची चर्चा सुरु आहे. या ऑक्शनपूर्वी मुंबई इंडियन्सच्या खेळाडूंची डिमांड वाढल्याचं दिसून येत आहे.

सूर्यकुमार यादव आणि रोहित शर्मा हे मुंबई इंडियन्सची साथ सोडणार असल्याची चर्चा सुरु आहे. रोहित मेगा ऑक्शनमध्ये येणार असल्याचं म्हटलं जातंय. तर सूर्यकुमार यादवला कोलकाता नाईट रायडर्स संघाने थेट कॅप्टन्सीची ऑफर दिली असल्याची चर्चा सुरु आहे. दरम्यान याबाबत एक मोठी अपडेट समोर आली आहे.

सूर्यकुमार यादवने (Suryakumar Yadav) मुंबई इंडियन्स संघाकडून खेळताना आपल्या आयपीएल कारकिर्दीची सुरुवात केली होती. त्यानंतर कोलकाता नाईट रायडर्सकडून खेळताना त्याला नवी ओळख मिळाली. गेल्या काही महिन्यांपासून अशी चर्चा सुरु आहे की, सूर्यकुमार यादव मुंबई इंडियन्स सोडून कोलकाता नाईट रायडर्स संघाकडून खेळणार आहे. मात्र या चर्चेला अखेर पूर्णविराम लागला आहे.

लाईव्ह हिंदुस्तानच्या वृत्तानुसार, मुंबई इंडियन्सच्या एका सुत्राने दिलेल्या माहितीनुसार, सूर्यकुमार यादव मुंबई इंडियन्स सोडून कुठेही जाणार नाहीये. लोकं लक्ष वेधून घेण्यासाठी अफवा पसरवत आहेत. मात्र सूर्यकुमार यादव कुठेही जाणार नाहीये.

सूर्यकुमार यादव हा मुंबई इंडियन्स संघातील प्रमुख फलंदाज आहे. टी-२० आंतरराष्ट्रीय क्रिकेटमध्येही तो अव्वल क्रमांकाचा फलंदाज आहे. त्यामुळे मुंबई इंडियन्स संघ त्याला सोडण्याची रिस्क घेणार नाही. मुंबई इंडियन्स त्याला रिटेन करु शकते. सूर्यकुमार कुमारचा रेकॉर्ड पाहिला,तर त्याने आयपीएल स्पर्धेतील १५० सामन्यांमध्ये ३५९४ धावा केल्या आहेत. यादरम्यान त्याने २ शतकं आणि २४ अर्धशतक झळकावली आहेत.