वेस्ट इंडिजविरुद्धच्या दुसऱ्या एकदिवसीय (ODI) सामन्यात भारतीय संघाचे सलामीवीर रोहित शर्मा आणि शुभमन गिल यांनी तुफानी फलंदाजी करत शानदार शतके ठोकली. वेस्ट इंडिजने दिलेल्या ४०६ धावांच्या विशाल आव्हानाचा पाठलाग करताना या दोन्ही फलंदाजांनी वेस्ट इंडिजच्या गोलंदाजांची जोरदार धुलाई केली. रोहित शर्माने ७५ चेंडूत १०१ धावांचा पाऊस पाडला.

रोहित-गिलची तुफानी शतके अन् जोरदार पलटवार

४०६ धावांच्या विराट आव्हानाचा पाठलाग करताना भारताची सुरुवात अत्यंत आक्रमक झाली. रोहित शर्मा आणि कर्णधार शुभमन गिल यांनी सुरुवातीपासूनच चौकार आणि षटकारांची उधळण केली. रोहित शर्माने आपला नेहमीचा 'हिटमॅन' अंदाज दाखवत शानदार शतक पूर्ण केले. या खेळीदरम्यान रोहितने एकदिवसीय क्रिकेटमध्ये आपल्या १२,००० धावांचा टप्पाही पार केला.

रोहित शर्माने ७५ चेंडूमध्ये ६ षटकार आणि १० चौकारांच्या मदतीने १०१ धावांची खेळी केली. रोहित शर्माने शुभमन गिल याच्यासोबत २६.२ षटकात २५५ धावांची विक्रमी भागिदारी केली.

शुभमन गिलनेही क्लासिक आणि तितकीच आक्रमक फलंदाजी करत आपले शतक साजरे केले. शुभमन गिल ८६ चेंडूत १४५ धावांवर खेळत आहे. या खेळीत गिलने १७ चौकार आणि ६ षटकार ठोकले आहे. रोहित आणि गिल या दोन्ही सलामीवीरांच्या शतकी भागीदारीमुळे भारताने वेस्ट इंडिजच्या डोंगराएवढ्या आव्हानाला सडेतोड उत्तर दिले असून सामना पूर्णपणे भारताच्या बाजूने झुकवला आहे.

वेस्ट इंडिजचा ४०५ धावांचा डोंगर

या सामन्यात नाणेफेक हारल्यानंतर प्रथम फलंदाजी करताना वेस्ट इंडिजने ५० षटकांत ७ गडी गमावून ४०५ धावांची डोंगराएवढी धावसंख्या उभारली होती. वेस्ट इंडिजकडून जॉन कॅम्पबेल (१०१), अमिर जांगू (११४) आणि कर्णधार शई होप (१०४) या तिघांनी धडाकेबाज शतके झळकावली.