Rishabh Pant Interview : न्यूझीलंड दौऱ्यावर टीम इंडियाचा उपकर्णधार रिषभ पंत खराब फॉर्मशी झुंजत आहे. त्यामुळं त्याचं टीम इंडियातील स्थान धोक्यात आलं आहे. काही क्रिकेटमधील जाणकार त्याच्या टीममधील असण्यावर प्रश्नचिन्ह उपस्थित करत आहेत.

त्याचवेळी एका लाइव्ह इंटरव्ह्यूमध्ये रिषभ पंतनं स्वतःच आपल्या फॉर्मविषयी रोखठोक मत मांडलं आहे. माझे आकडे इतके पण वाईट नाहीत, असं तो म्हणाला. समालोचक हर्षा भोगले यांनी त्याचा इंटरव्ह्यू घेतला. त्याला खराब फॉर्मविषयी विचारलेल्या प्रश्नावर तो थेट भिडला.

तिसऱ्या सामन्याच्या काही तास आधीच हर्षा भोगले यांनी रिषभ पंतची मुलाखत घेतली. मी टी २० क्रिकेटमध्ये सलामीला येऊ इच्छितो, असं रिषभनं थेट सांगितलं. तर वनडेमध्ये चौथ्या किंवा पाचव्या क्रमांकावर फलंदाजीसाठी येणे योग्य आहे. तर कसोटीत मी पाचव्या स्थानी फलंदाजी करतो. पण प्रशिक्षक आणि कर्णधार टीमसाठी काय योग्य आहे याचा विचार करतात. त्यावर सगळ्या गोष्टी अवलंबून असतात. मला जेव्हा कधी संधी मिळते, त्यावेळी मी चांगली कामगिरी करण्याचा प्रयत्न करतो, असं पंत म्हणाला. (Latest Marathi News)

व्हिडिओ बघा!

'आताच माझी तुलना करू नका'

तुझी कसोटीतील आकडेवारी चांगल आहे. मात्र, वनडे आणि टी २० मधील आकडेवारी इतकीही चांगली नाही, असा प्रश्न हर्षा भोगलेंनी रिषभला विचारला. त्यावर व्हाइट बॉल क्रिकेटमध्ये माझी आकडेवारी इतकीही वाईट नाही. मी आता २४-२५ वर्षांचा आहे. अशात माझी तुलना करणे योग्य नाही. ज्यावेळी मी ३०-३२ चा होईल त्यावेळी अशा प्रकारची तुलना केली जाऊ शकते. यावेळी रिषभ पंत चिडल्याचं दिसलं. (Sports News)

व्हिडिओ व्हायरल, नेटकरी चिडले

रिषभ पंतचा हा इंटरव्ह्यू सोशल मीडियावर व्हायरल झाला. ज्या प्रकारे तो हर्षा भोगलेंशी बोलला ते नेटकऱ्यांना आवडलं नाही. रिषभ पंतच्या बोलण्यात गर्व दिसून येतोय. त्यावर नियंत्रण ठेवायला हवा, अशा प्रतिक्रिया नेटकऱ्यांनी दिल्या.

दरम्यान, टी २० वर्ल्डकपमध्ये रिषभ पंतला दोन सामन्यांत संधी मिळाली. पण त्यातही तो अपयशी ठरला. त्यानंतर न्यूझीलंडचा दौराही त्याच्यासाठी निराशाजनक ठरला. त्यामुळे वनडे आणि टी २० मध्ये त्याच्या कामगिरीवर प्रश्नचिन्ह उपस्थित केले जात आहेत. पुढच्या वर्षी वर्ल्डकप स्पर्धा आहे. अशावेळी आतापासूनच टीम इंडियाकडून खेळाडूंच्या कामगिरीवर विचार सुरू आहे.