काबुलमध्ये (Kabul) प्रवेश केल्यानंतर तालिबानने (Taliban) आता संपूर्ण अफगाणिस्तानचा (Afganistan) ताबा घेतला आहे. रविवारी त्यांनी अफगाणिस्तानचे राष्ट्रपती भवन काबीज केले आणि यासह अफगाणिस्तान सरकार कोसळले. अहवालानुसार, राष्ट्रपती अश्रफ घनी (Ashraf Ghani) यांनी देश सोडला आहे आणि लवकरच तालिबान अफगाणिस्तानात पुन्हा इस्लामिक अमिरात स्थापन करण्याची घोषणा करू शकते.

यामुळे अफगाण लोकांमध्ये भीतीचे वातावरण आहे आणि ते आपला देश सोडून जगभर स्थलांतर करत आहेत. अफगाणिस्तान क्रिकेट संघाचा स्टार खेळाडू राशिद खान आपल्या देशात होत असलेल्या अराजकामुळे खूप नाराज आहे. अफगाणिस्तानच्या नागरिकांची अशी अवस्था पाहून राशिद रात्रभर झोपू शकला नाही. राशिद आणि अष्टपैलू मोहम्मद नबी यांनी याआधी जगातील लोकांना आपल्या देशाला मदत करण्याचे आवाहन केले होते.

अफगाणिस्तानातील परिस्थिती पाहता पुढच्या महिन्यात सुरु होणाऱ्या आयपीएल २०२१ मध्ये राशिद आणि नबी खेळणार का? असा प्रश्न विचारला असता संघाच्या व्यवस्थापकांकडून याला होकार देण्यात आला आहे. एसआरएचचे सीईओ के. शानमुगम म्हणाले की, अफगाणिस्तानचे दोन्ही खेळाडू संयुक्त अरब अमिरातीमध्ये आयपीएलचा भाग असतील. "आम्ही सध्या काय घडत आहे, याबद्दल बोललो नाही, परंतु ते स्पर्धेसाठी उपलब्ध असणार आहेत." युएईमध्ये संघ कधी पोहचणार यावर विचारले असता ते म्हणाले ३१ ऑगस्टपर्यंत आम्ही युएईला रवाना होणार आहोत.

इंग्लंडचा माजी कर्णधार केविन पीटरसनने खुलासा केला आहे. फिरकीपटू राशिद खान अफगाणिस्तानच्या परिस्थितीमुळे चिंतेत आहे आणि आपल्या कुटुंबाला देशाबाहेर नेण्यास असमर्थ आहे. अफगाणिस्तानमध्ये सुरू असलेल्या गोंधळामुळे काबुलच्या हमीद करझई इंटरनॅशनल (एचकेआय) विमानतळावर जगभरातील विमान उड्डाणांवर परिणाम झाला आहे. रशीद सध्या यूके मध्ये 'द हंड्रेड'मध्ये ट्रेंट रॉकेट्स कडून खेळत आहे.

Edited By: Pravin Dhamale