IPL 2025 Punjab vs RCB : आरसीबीला घरच्या मैदानावर सलग तिसऱ्या पराभवाचा सामना करावा लागला. पावसाने प्रभावित झालेल्या सामन्यातपंजाब किंग्सने रॉयल चॅलेंजर्स बेंगलोरचा ५ गडी राखून पराभव केला. १४ षटकांच्या सामन्यात पंजाब किंग्सने टॉस जिंकून प्रथम गोलंदाजीचा निर्णय घेतला आणि RCB ला ९५ धावांत रोखले. प्रत्युत्तरात, नेहाल वढेराच्या शानदार खेळीच्या जोरावर पंजाबने १३ व्या षटकाच्या पहिल्या चेंडूवर विजय मिळवला. नेहाल वढेराला सामनावीर पुरस्काराने गौरवण्यात आले.

RCB ची खराब सुरुवात

पंजाब किंग्सच्या कर्णधार श्रेयस अय्यरने टॉस जिंकून प्रथम गोलंदाजीचा निर्णय घेतला. RCB ची सुरुवात अत्यंत खराब झाली. अर्शदीप सिंगने पहिल्याच षटकात फिल सॉल्टला (४) बाद केले, तर विराट कोहली (४) याला मार्को जॅन्सनने पायचीत करत तंबूत धाडले. युजवेंद्र चहलनेही शानदार गोलंदाजी करत राजत पाटीदार (२३) आणि जितेश शर्मा (२) यांना बाद केले. RCB ची अवस्था ७ बाद ४२ अशी झाली होती. मात्र, टिम डेव्हिडने २६ चेंडूत 5० धावांची नाबाद खेळी करत आरसीबीला ९५ धावांपर्यंत पोहोचवले. पंजाबकडून अर्शदीप सिंग, मार्को जॅन्सन, युझवेंद्र चहल आणि हरप्रीत ब्रार यांनी प्रत्येकी २ बळी घेतले.

पंजाबकडून सावध फलंदाजी

९६ धावांच्या आव्हानाचा पाठलाग करताना पंजाब किंग्सची सुरुवात खराब झाली. भुवनेश्वर कुमारने प्रभसिमरन सिंगला (१७) आणि जोश हेजलवूडने प्रियांश आर्याला (१६) बाद केले. जोश हेजलवूडने भेदक मारा करत आरसीबीच्या फलंदाजाला एकापाठोपाठ एक माघारी झाडले. हेजलवूडने श्रेयस अय्यर (७) आणि जोश इंग्लिस (१४) यांना बाद करत सामन्यात रंगत निर्माण केली. पण नेहाल वढेराने संयमी फलंदाजी करत पंजाबला विजय मिळवून दिला. नेहाल वढेराने संयमी खेळी खेळत १९ चेंडूत ३३ धावांची खेळी केली. या खेळीत त्याने ३ षटकार आणि २ चौकार लगावले. मार्कस स्टॉयनिसने नाबाद १२ धावा करत त्याला साथ दिली.