आयपीएल २०२४ स्पर्धेतील पहिल्या सामन्यापासून विराट कोहली रॉयल चॅलेंजर्स बंगळुरू संघासाठी संकटमोचक ठरतोय. पंजाब किंग्जविरुद्ध झालेल्या निर्णायक सामन्यातही विराटने ९२ धावांची शानदार खेळी केली आणि संघाच्या विजयात मोलाचं योगदान दिलं. पहिल्या डावात फलंदाजी करताना रॉयल चॅलेंजर्स बंगळुरू संघाने २० षटकअखेर ७ गडी बाद २४१ धावा केल्या. या धावांचा पाठलाग करताना पंजाबचा डाव १८१ धावांवर आटोपला आहे. या परभवणासह पंजाब किंग्जचा संघ प्लेऑफच्या शर्यतीतून बाहेर पडला आहे.

पंजाब किंग्जच्या होम ग्राऊंडवर पार पडलेल्या या सामन्यात पंजाबने नाणेफेक जिंकला आणि प्रथम गोलंदाजी करण्याचा निर्णय घेतला. रॉयल चॅलेंजर्स बंगळुरू संघाकडून प्रथम फलंदाजी करताना विराट कोहलीने ४७ चेंडूंचा सामना करत सर्वाधिक ९२ धावांची खेळी केली. तर रजत पाटीदारने २३ चेंडूंचा सामना करत ५५ धावा केल्या. शेवटी कॅमेरून ग्रीनने २७ चेंडूंचा सामना ४६ धावांची खेळी केली. या शानदार खेळीच्या बळावर रॉयल चॅलेंजर्स बंगळुरू संघाने २० षटकअखेर ७ गडी बाद २४१ धावा केल्या.

पंजाब किंग्ज संघाला हा सामना जिंकण्यासाठी २४२ धावा करायच्या होत्या. हे आव्हान खूप मोठं होतं. पंजाबकडून धावांचा पाठलाग करताना रिले रूसोने २७ चेंडूंचा सामना करत ६१ धावांची खेळी केली. तर शशांक सिंगने १९ चेंडूत ३७ धावा केल्या. मात्र पंजाबचा संघ विजयापसून ६० धावा दूर राहिला.

या पराभवासह पंजाबचा संघ प्लेऑफच्या शर्यतीतून बाहेर पडला आहे. तर रॉयल चॅलेंजर्स बंगळुरूचा संघ १० गुणांसह गुणतालिकेत सातव्या स्थानी पोहोचला आहे. प्लेऑफमध्ये जाण्यासाठी आता रॉयल चॅलेंजर्स बंगळुरूचा संघ चेन्नई आणि दिल्लीविरुद्ध स्पर्धा करताना दिसून येणार आहे.