भारतीय नेमबाज मनू भाकरने ऑलिम्पिक २०२४ स्पर्धेत भारताचा झेंडा अभिमानाने फडकवला आहे. मनू भाकरने १० मीटर पिस्तुल प्रकारात भारताला कांस्यपदक मिळवून दिलं . त्यानंतर मनू आणि सरबजोत सिंग यांनी मिळून १० मीटर पिस्तुल मिश्र प्रकारात भारताला कांस्यपदक मिळवून दिलं होतं. दरम्यान या दोघांनी प्रशिक्षण देणाऱ्या नेमबाजी प्रशिक्षक समरेश जंग यांच्याबाबत मोठी बातमी समोर आली आहे.

मनू भाकर आणि सरबजोत सिंग यांचे राष्ट्रीय नेमबाजी प्रशिक्षक समरेश जंग यांचं घर पाडलं जाणार असल्याचं म्हटलं जात आहे. समरेश जंग हे दिल्लीतील खैबर पास परिसरात राहतात. त्यांना नोटीस बजावण्यात आली आहे. या नोटीसमध्ये असं म्हटलं गेलं आहे की, ज्या जमिनीवर हे घर आहे, संरक्षण मंत्रालयाच्या जमिनीवर आहे. त्यामुळे हे बांधकाम बेकायदेशीर असल्याचं म्हटलं जात आहे.

समरेश जंग यांची एक सोशल मीडिया पोस्ट सध्या तुफान व्हायरल होत आहे. ज्यात म्हटलं गेलंय की, ' भारतीय नेमबाजांनी दोन पदकं जिंकली. या विजयानंतर मला अतिशय आनंद झाला. मात्र घरी परतल्यानंतर माझं घर आणि माझं कुटुंब २ दिवसात उद्धव्त होणार असल्याची बातमी मिळाली. मी एक ऑलिम्पियन आणि अर्जुन पुरस्कारविजेता असल्यामुळे मला आशा आहे की, मला आणि माझ्या शेजारच्यांना सन्मानान बाहेर जाता येईल. मला जागा खाली करण्यासाठी कमीत कमी दोन महिन्यांचा वेळ देण्यात यावा अशी विनंती करतो.'

तसेच त्यांनी लिहीले की, ' एक ऑलिम्पियन असल्यामुळे मला सन्मानाने निरोप देण्यात यावा अशी माझी अपेक्षा आहे.' यासह त्यांनी प्रश्नही उपस्थित केले आहेत. लोकांची घरी का पाडली जात आहेत? अचानक संपूर्ण वसाहत बेकायदेशीर कशी घोषित करण्यात आली?