आयसीसी टी-२० वर्ल्डकप २०२४ स्पर्धा झाल्यानंतर राहुल द्रविड यांचा मु्ख्य प्रशिक्षकपदाचा कार्यकाळ संपला आहे. त्यांची रिप्लेसमेंट म्हणून गौतम गंभीरची भारतीय संघाच एन्ट्री झाली आहे. इथून पुढे गौतम गंभीर भारतीय संघाच्या मुख्य प्रशिक्षकाची भूमिका पार पाडणार असल्याची माहिती जय शहा यांनी दिली आहे. मुख्य प्रशिक्षकपदी वर्णी लागताच गंभीरवर चहुबाजूंनी कौतुकाचा वर्षाव केला जात आहे. दरम्यान त्याची गंभीरची पत्ती नताशाने लिहिलेली पोस्ट सध्या सोशल मीडियावर तुफान व्हायरल होत आहे.

गौतम गंभीरला ही मोठी जबाबदारी मिळतात त्याची पत्नी नताशा जैनने इंस्टाग्राम अकाऊंटवर एक स्टोरी शेअर केली आहे. आपल्या इंस्टाग्राम स्टोरीवर तिने,' कारण,तो भारतीय संघाचं नेतृत्व करण्यासाठी दावेदार आहे.' असं लिहिलंय.

तर भारतीय संघाच्या मुख्य प्रशिक्षकाची जबाबदारी मिळताच गंभीरनेही आपल्या अधिकृत एक्स अकाऊंटवरुन एक पोस्ट शेअर केली आहे. ज्यात त्याने लिहिले की, ' भारत माझी ओळख आहे आणि भारत देशाची सेवा करणं हे माझ्या जीवनातील सर्वात मोठे सौभाग्य आहे. पुन्हा भारतीय संघात येऊन मला सन्मानित वाटत आहे. माझं लक्ष्य तेच राहणार आहे,जे आधीही होतं. निळ्या जर्सीतील खेळाडूंवर १.४ अब्ज भारतीयांची स्वप्न आहेत. हे स्वप्न पूर्ण करण्यासाठी मी सर्वकाही करेल.'

गौतम गंभीर हा २००७ टी-२० वर्ल्डकप आणि २०११ वनडे वर्ल्डकप स्पर्धेतील विजयाचा हिरो आहे. भारतीय संघाने या दोन्ही स्पर्धेतील फायनलमध्ये विजय मिळवला होता. या विजयात गंभीरचा मोलाचा वाटा राहिला आहे. त्याने टी-२० वर्ल्डकप स्पर्धेतील फायनलमध्ये ७५ धावांची खेळी केली होती. तर वनडे वर्ल्डकप स्पर्धेतील फायनलमध्ये त्याने ९७ धावांची खेळी केली. यावेळी त्याच्यावर हेड कोच म्हणून भारतीय संघाला आयसीसीची ट्रॉफी जिंकून देण्याची संधी असणार आहे.