Viral Catch Video: आयपीएल २०२३ स्पर्धा झाल्यानंतर आता तामिळनाडू प्रीमियर लीग स्पर्धेचा थरार सुरु झाला आहे. या स्पर्धेत देखील युवा खेळाडूंचा बोलबाला पाहायला मिळत आहे. या स्पर्धेतील आठव्या सामन्यात डींडीगुल ड्रॅगन्स आणि मदुराई पँथर्स हे दोन्ही संघ आमने सामने आले होते.

या सामन्यात आर अश्विनच्या नेतृत्वाखाली खेळणाऱ्या डींडीगुल ड्रॅगन्स संघाने दमदार कामगिरी करत ७ गडी राखुन विजय मिळवला आहे. या सामन्याबद्दल बोलायचं झालं तर मदुराई संघाने प्रथम फलंदाजी करताना १२३ धावा केल्या होत्या.

या धावांचा पाठलाग करतांना डींडीगुल ड्रॅगन्स संघाने १४.१ षटकात दिलेलं आव्हान पूर्ण केले. या सामन्यात मुरुगन अश्विनने एक भन्नाट झेल टिपला आहे. ज्याचा व्हिडिओ सध्या सोशल मीडियावर जोरदार व्हायरल होत आहे. (Murugan ashwin catch video)

तर झाले असे की, डींडीगुल ड्रॅगन्स संघाची फलंदाजी सुरु असताना एस अरुण तिसऱ्या क्रमांकावर फलंदाजी करण्यासाठी आला होता. चौथ्या षटकातील चौथ्या चेंडूवर एस अरुणने मोठा फटका खेळण्याचा प्रयत्न केला. मात्र त्याचा हा प्रयत्न फसला. कारण चेंडू उंच हवेत गेला. चेंडू हवेत जाताच मुरुगन अश्विन चेंडूच्या मागे धावला.

चेंडू खाली येणार इतक्यात त्याला जाणवलं की,चेंडू आपल्यापासून दूर आहे. त्यावेळी त्याने डाइव्ह मारत भन्नाट झेल टिपला. हा झेल पाहून फलंदाज आणि सामना पाहण्यासाठी आलेल्या प्रेक्षकांनाही विश्वास बसत नव्हता. या झेलचा व्हिडिओ सध्या सोशल मीडियावर जोरदार व्हायरल होत आहे. (Latest sports updates)

तसेच या सामन्याबद्दल बोलायचं झालं तर, या सामन्यात मदुराई पँथर्स संघासाठी जे कौशिकने सर्वाधिक ४५ धावांची खेळी केली. तर गोलंदाजी करताना गुरजपनीत सिंगने सर्वाधिक ३ गडी बाद केले. तर डींडीगुल ड्रॅगन्स संघाच्या कामगिरीबद्दल बोलायचं झालं तर, बाबा इंद्रजितने सर्वाधिक ७८ धावांचे योगदान दिले. त्याने या खेळीदरम्यान ७ चौकार आणि ४ षटकार मारले. तर सुबोध बाठी आणि पी सरवन कुमारने प्रत्येकी ३-३ गडी बाद केले.

तसेच या स्पर्धेबद्दल बोलायचं झालं तर, या स्पर्धेत आतापर्यंत एकूण ८ सामने खेळले गेले आहेत. गुणतालिकेत डींडीगुल ड्रॅगन्स संघ अव्वल स्थानी पोहोचला आहे. आर अश्विनच्या नेतृत्वाखाली खेळणाऱ्या डींडीगुल ड्रॅगन्स संघाने आपल्या पहिल्या सामन्यात त्रिची संघावर विजय मिळवला होता. तर आता दुसऱ्या सामन्यात डींडीगुल ड्रॅगन्स संघाने मदुराई पँथर्स संघावर विजय मिळवला आहे.