देशभरात लोकशाहीचा उस्तव सुरु आहे. आज (२० मे) देशभरात पाचव्या टप्प्यातील मतदान सुरु आहे. पाचव्या टप्प्यात महाराष्ट्रातील १३ मतदारसंघात मतदान होणार आहे. मतदान करण्यासाठी नागरिकांनी सकाळी ७ वाजल्यापासून प्रचंड गर्दी केली आहे. दरम्यान भारताचा मास्टर ब्लास्टर म्हणून ओळखल्या जाणाऱ्या सचिन तेंडुलकरने देखील मतदान केलं असून इतरांनाही मतदान करण्याचं आवाहन केलं आहे.

सचिन तेंडुलकरने सहकुटुंब मतदान करण्यासाठी हजेरी लावली आहे. सचिनसह अर्जुन तेंडुलकरने देखील मतदान करण्यासाठी हजेरी लावल्याचे पाहायला मिळाले आहे. तेंडुलकर कुटुंबाने पाली हिल मतदान केंद्रावर जाऊन आपल्या मतदानाचा हक्क बजावला.

मतदान केल्यानंतर सचिनने माध्यमांशी संवाद साधला. यादरम्यान त्याने मतदानाचं महत्व पटवून देत मतदान करण्याचं आवाहन केलं आहे. माध्यमांशी बोलताना तो म्हणाला की, ' मी निवडणूक आयोगाचा आयकॉन आहे. मतदानाते महत्व पटवून देण्यासाठी आणि मतदानाबद्दल जागरुकता वाढवण्यासाठी मी अनेक उपक्रमांमध्ये सहभाग घेतला. दोन कारणांमुळे समस्या उद्भवतात. पहिलं म्हणजे जेव्हा तुम्ही विचार नर करता कार्य करता आणि दुसरं म्हणजे जेव्हा तुम्ही काहीच न करता केवळ विचार करता. मी सर्वांना आवाहन करतो की, सर्वांनी मतदान करा. हे आपल्या देशासाठी अतिशय महत्वाचं आहे.'

अजिंक्य रहाणेनेही केलं मतदान

भारतीय संघाचा स्टार फलंदाज अजिंक्य रहाणेनेही आपल्या मतदानाचा हक्क बजावला आहे. नुकताच आयपीएल खेळून घरी परतलेल्या अजिंक्य रहाणेने आपल्या पत्नीसह मतदानाचा हक्क बजावला. त्याने सोशल मीडियावर पोस्ट शेअर करत याबाबत माहिती दिली.