मुंबई इंडियन्स विरुद्ध रॉयल चॅलेंजर्स बंगळुरू हा सामना उद्या वानखेडे स्टेडियमवर खेळला जाईल. सामन्याआधी मुंबईच्या चाहत्यांसाठी आनंदाची बातमी समोर आली आहे. दुखापतग्रस्त जसप्रीत बुमराह मुंबई इंडियन्सच्या ताफ्यात सामील झाला आहे. उद्याच्या बंगळुरू विरुद्धच्या सामन्यामध्ये तो सामील होईल असेही म्हटले जात आहे.

सोशल मीडियावर व्हिडीओ पोस्ट करत मुंबई इंडियन्सच्या संघाने चाहत्यांना गोड बातमी दिली. या व्हिडीओमध्ये बुमराहची पत्नी संजना आणि मुलगा अंगददेखील होता. या व्हिडीओनंतर आणखी एक व्हिडीओ मुंबईच्या सोशल मीडिया अकाउंटवर पोस्ट करण्यात आला आहे. या व्हिडीओत ट्रेंट बोल्ट आणि जसप्रीत बुमराह एकत्र पाहायला मिळत आहेत.

व्हिडीओच्या सुरुवातीला ट्रेंट बोल्ट बुमराहकडे स्माईल करत असल्याचे दिसते. त्यानंतर बोल्ट बुमराहला भेटायला जातो. बुमराहला पाहून बोल्ट 'तुला पाहून खूप आनंद झाला, कसा आहेस?' असे म्हणतो. बुमराह बोल्टला मिठी मारतो आणि दुखापतीतून बरा झाल्याचे सांगताना 'मला खेळायची संधी मिळाली आहे', असे जसप्रीत बुमराह म्हणतो. सोशल मीडियावर बोल्ट आणि बुमराहच्या या व्हिडीओची चर्चा पाहायला मिळत आहे.

ऑस्ट्रेलियामध्ये बॉर्डर-गावस्कर ट्रॉफीदरम्यान पाचव्या कसोटी सामन्यामध्ये जसप्रीत बुमराहच्या पाठीच्या भागाला दुखापत झाली होती. त्यामुळे बुमराह मैदानाबाहेर गेला होता. त्या सामन्यानंतर बुमराहच्या दुखापतीवर उपचार सुरु झाले. या दुखापत प्रकरणामुळे त्याला चॅम्पियन्स ट्रॉफीमध्ये सहभागी होता आले नाही. आयपीएल २०२५ मध्ये तो खेळताना दिसेल की नाही अशी चिंता वाटत होती. पण आता ही चिंता दूर झाली आहे. जसप्रीत बुमराह खेळण्यासाठी परतला आहे.