मुंबई : सनरायझर्स हैदराबादच्या ईशान किशनने रविवारी राजस्थान रॉयल्सच्या विरोधात धुव्वादार खेळी खेळली आहे. आयपीएल सीजनच्या पहिल्या सामन्यात ईशान किशानने पहिलं धमाकेदार शतक ठोकलं आहे. ईशानने ४५ चेंडूत शतक पूर्ण केलं आहे.

राजीव गांधी इंटरनॅशनल स्टेडियमवर सुरु असलेल्या सामन्यात किशनने २५ बॉलमध्ये अर्धशतक पूर्ण केलं. त्यानंतर जोरदार फटकेबाजीला सुरुवात करत ४५ चेंडूत शतक पूर्ण केलं. आयपीएलच्या लिलावात सनरायझर्स हैदराबादने ईशान किशनने ११.२५ कोटींना खरेदी केलं.

सनरायझर्स हैदराबादच्या सर्व खेळाडूंनी धुव्वादार फलंदाजी केली. अभिषेक शर्माने ११ चेंडूत २४, ट्रेविस हेडने ३१ चेंडूत ६७, नितीश कुमारने १५ चेंडूत ३० धावांची खेळी खेळली. यंदा किशनला आयपीएल २०२५ साठी मुंबई इंडियन्सने रिलीज केलं.

राजस्थान रॉयल्सने टॉस जिंकून बॉलिंग करण्याचा निर्णय घेतला. त्यानंतर फलंदाजी करण्यासाठी उतरलेल्या सनरायझर्स हैदराबादच्या अभिषेक शर्मा आणि ट्रेविस हेडने पहिल्या विकेटसाठी ४५ धावा कुटल्या. चौथ्या षटकात महीश तीक्षणाने अभिषेक शर्माला बाद केलं. त्यानंतर हेडच्या रुपात हैदराबादला दुसरा धक्का बसला. हेडने ३१ बॉलमध्ये ६७ धावा कुटल्या.

नीतीश कुमारने १५ चेंडूत ३० धावा कुटल्या. तर क्लासनने १४ चेंडूत ३४ धावा कुटल्या. सनरायजर्स हैदराबादने २० षटकात सहा गडी गमावून २८६ धावा कुटल्या. ईशानने ४७ चेंडूत ११ चौकार आणि ६ षटकार लगावत नाबाद १०६ धावा कुटल्या. सनरायजर्स हैदराबादच्या फलंदाजांनी राजस्थान रॉयल्सला २८७ धावांचं तगडं आव्हान दिलं आहे. हैदराबादच्या आव्हानाचा राजस्थानचा संघ कसा पाठलाग करतो, हे पाहावे लागेल.