IPL 2025 Mega Auction News In Marathi: आयपीएल २०२५ स्पर्धेचा लिलाव येत्या २४-२५ नोव्हेंबर रोजी सौदी अरेबियातील जेद्दा या शहरात रंगणार आहे. या लिलावासाठी १५७४ खेळाडूंनी नाव नोंदणी केली आहे. तर ३१ ऑक्टोबरला सर्व १० फ्रेंचायझींनी एकूण ४६ खेळाडूंना रिटेन केलं आहे.

लिलावासाठी नाव नोंदणी करणाऱ्यांमध्ये ११६५ भारतीय तर ४०९ परदेशी खेळाडूंचा समावेश आहे. या लिलावासाठी मोहम्मद कैफ आणि युवराज सिंग यांनी देखील नाव नोंदणी केली आहे.

भारताचा स्टार फलंदाज सचिन तेंडुलकरचा मुलगा अर्जुन तेंडुलकरनेही आयपीएल २०२५ स्पर्धेसाठी नाव नोंदणी केली आहे. गेल्या २ हंगामांपासून तो या संघाकडून खेळतोय. आगामी हंगामासाठी मुंबई इंडियन्सने हार्दिक पंड्या, रोहित शर्मा, सूर्यकुमार यादव, तिलक वर्मा आणि जसप्रीत बुमराह यांना रिटेन केलं आहे.

तर अर्जुन तेंडुलकरला रिलीज केलं आहे. त्याची मूळ किंमत ३० लाख रुपये इतकी असणार आहे. उत्तर प्रदेशचा २७ वर्षीय स्टार खेळाडू युवराज सिंगनेही आगामी लिलावासाठी आपलं नाव नोंदवलं आहे.

देशांतर्गत क्रिकेटमध्ये उत्तर प्रदेश संघाकडून खेळणाऱ्या या खेळाडूने आजवर एकही टी-२० सामना खेळलेला नाही. त्याच्या कारकिर्दीबद्दल बोलायचं झालं, तर त्याला प्रथम श्रेणी क्रिकेटमध्ये ७ सामने खेळण्याची संधी मिळाली आहे. यादरम्यान त्याने २७३ धावा चोपल्या आहेत. या लिलावात त्याची मूळ किंमत ३० लाख रुपये असणार आहे.

आगामी आयपीएल स्पर्धेसाठी होणाऱ्या लिलावाच्या रिंगणात मोहम्मद कैफ देखील असणार आहे. कैफ हा भारताचा स्टार गोलंदाज मोहम्मद शमीचा भाऊ आहे. देशांतर्गत क्रिकेटमध्ये बंगालकडून खेळणाऱ्या या गोलंदाजाने आतापर्यंत ७ सामन्यांमध्ये २२ गडी बाद केले आहेत. त्याची मूळ किंमतही ३० लाख रुपये इतकी असणार आहे.