India vs south africa 2nd test, Jasprit Bumrah Record:

केपटाऊनच्या मैदानावर भारत आणि दक्षिण आफ्रिका यांच्यातील दुसरा कसोटी सामना खेळला जाणार आहे. भारतीय संघ या मैदानावर आजवर एकही सामना जिंकू शकलेला नाही. आतापर्यंत दोन्ही संघ या मैदानावर ६ वेळेस आमने सामने आले आहेत.

यादरम्यान दक्षिण आफ्रिकेने ४ सामने जिंकले आहेत. तर २ कसोटी सामने ड्रॉ राहिले आहेत. दरम्यान ३ जानेवारीपासून सुरू होणाऱ्या दुसऱ्या कसोटी सामन्यात भारतीय संघातील वेगवान गोलंदाज जसप्रीत बुमराहला एक मोठा रेकॉर्ड आपल्या नावावर करण्याची संधी असणार आहे.

पहिल्या सामन्यात भारतीय संघाचा दारुण पराभव..

भारत आणि दक्षिण आफ्रिका या दोन्ही संघांमधील पहिला सामना सेंच्युरियनच्या मैदानावर पार पडला होता. या सामन्यात दक्षिण आफ्रिकेने दमदार खेळ करत भारतीय संघाला मागे सोडलं. हा सामना भारतीय संघाला १ डाव आणि ३२ धावांनी गमवावा लागला. दुसरा कसोटी सामना येत्या ३ जानेवारीपासून खेळला जाणार आहे. दरम्यान हा सामना जिंकून भारतीय संघ मालिका १-१ च्या बरोबरीत आणण्याच्या प्रयत्नात असणार आहे. जर या सामन्यात रोहितने भारतीय संघाला विजय मिळवून दिला. तर तो असा कारनामा भारताचा दुसराच कर्णधार ठरेल. यापूर्वी केवळ एमएस धोनीला दक्षिण आफ्रिकेत कसोटी मालिका ड्रॉ करण्यात यश आले आहे. मात्र हे सोपं मुळीच नसणार आहे. (Latest sports updates)

बुमराहकडे नंबर १ बनण्याची संधी..

पहिल्या कसोटी सामन्यात जसप्रीत बुमराहने अप्रतिम गोलंदाजी केली होती. तो या सामन्यात भारतीय संघाकडून सर्वात यशस्वी गोलंदाज ठरला होता. त्याने गोलंदाजी करताना दक्षिण आफ्रिकेच्या ४ फलंदाजांना बाद केलं. केवळ ३ गडी बाद करताच तो या मैदानावर कसोटीत सर्वाधिक गडी बाद करणारा गोलंदाज ठरू शकतो.

बुमराहने या मैदानावर २ सामने खेळले आहेत. यादरम्यान त्याने १० गडी बाद केले आहेत. त्याने एका डावात ५ गडी बाद करण्याचा कारनामाही केला आहे. तर अनिल कुंबळे यांनी या मैदानावर खेळताना ३ सामन्यात ११ गडी बाद केले होते. तर जवागल श्रीनाथ यांनी १२ गडी बाद केले होते. बुमराहला नंबर १ बनण्यासाठी ३ फलंदाजांना बाद करायचं आहे.