आयसीसी चॅम्पियन्स ट्रॉफी २०२५ स्पर्धेतील फायनलचा सामना भारत आणि न्यूझीलंड या दोन्ही संघांमध्ये पार पडला. हा सामना जिंकून भारतीय संघाने इतिहास घडवला. भारतीय संघाने तिसऱ्यांदा ही ट्रॉफी उंचावली आहे.

ही ट्रॉफी जिंकून देण्यात ११ खेळाडूंनी मोलाची भूमिका बजावली. दरम्यान जेव्हा विकेट्स पडत होते, त्यावेळी केएल राहुलने एक बाजू धरुन ठेवली होती. हा सामना जिंकल्यानंतर केएल राहुलचेही डोळे पाणावले.

२०२३ वनडे वर्ल्डकप स्पर्धेच्या पराभवाचा व्हिलन

यापूर्वी भारतीय संघाने आयसीसी वनडे वर्ल्डकप २०२३ स्पर्धेतील फायनलमध्येही दमदार खेळ करुन दाखवला होता. या स्पर्धेत भारताने साखळी फेरीतील सर्व सामने जिंकले होते, मात्र फायनलमध्ये भारताला ऑस्ट्रेलियाकडून पराभवाचा सामना करावा लागला होता.

या सामन्यानंतर केएल राहुलला जोरदार ट्रोल केलं गेलं होतं. कारण या सामन्यात त्याने १०७ चेंडूंचा सामना करत त्याने ६१.७ च्या स्ट्राईक रेटने ६६ धावा केल्या होत्या. या स्लो इनिंगमुळे त्याला पराभवाचा व्हिलन ठरवण्यात आलं होतं. मात्र आता तो भारतीय संघाच्या विजयाचा हिरो ठरला आहे.

चॅम्पियन्स ट्रॉफीच्या विजयाचा हिरो

या स्पर्धेत भारतीय संघ जेव्हा जेव्हा अडचणीत सापडला, तेव्हा तेव्हा केएल राहुलने महत्वपूर्ण खेळी करुन भारतीय संघाच्या विजयात मोलाचं योगदान दिलं. यापूर्वी ऑस्ट्रेलियाविरुद्ध झालेल्या सामन्यातही भारतीय संघाचा डाव गडगडला होता, त्यावेळी केएल राहुलने षटकार मारुन भारतीय संघाला विजय मिळवून दिला होता.

न्यूझीलंडविरुद्धच्या सामन्यातही भारतीय संघाचा डाव गडगडला होता, मात्र केएल राहुलने एक बाजू धरुन ठेवली आणि भारतीय संघाच्या विजयात मोलाची भूमिका बजावली. या सामन्यात त्याने ३३ चेंडूंचा सामना करत नाबाद ३४ धावांची खेळी केली. जडेजान जेव्हा चौकार मारुन भारतीय संघाला विजय मिळवून दिला, त्यावेळी केएल राहुलचे डोळे पाणावलेले दिसून आले.