Sarfaraz Khan Shot Video:

इंग्लंडविरुद्ध सुरू असलेल्या पाचव्या कसोटी सामन्यातील दुसऱ्या दिवशी भारतीय फलंदाजांचा बोलबाला पाहायला मिळाला आहे. फलंदाजी सर्वांनी बहुमूल्य योगदान दिलं. मात्र यशस्वी जयस्वाल आणि सरफराज खानने केलेली खेळी खास ठरली. जयस्वालने ९८.२८ च्या स्ट्राइक रेटने ५७ धावा केल्या. तर दुसरीकडे सरफराज खानने ९३.३३ च्या सरासरीने ५६ धावा कुटल्या. यादरम्यान त्याने ८ चौकार आणि १ षटकार मारला. यादरम्यान त्याने एक सचिन तेंडुलकर स्टाईल बैठक शॉट मारला, ज्याचा व्हिडिओ सध्या सोशल मीडियावर तुफान व्हायरल होत आहे.

सरफराज खान हा आपल्या आक्रमक फलंदाजीसाठी ओळखला जातो. त्याने या डावात मार्क वुडला टार्गेट केलं. आपल्या अर्धशतकी खेळीदरम्यान त्याने एकापेक्षा एक शॉट खेळले. दरम्यान लक्ष वेधलं ते बैठक शॉटने. त्याच्या या हटके शॉटचा व्हिडिओ सोशल मीडियावर जोरदार व्हायरल होत आहे.

पडिक्कलसोबत मिळून महत्वपूर्ण भागीदारी..

या सामन्यातील पहिल्या डावात रोहित शर्मा आणि शुभमन गिल या दोघांनी मिळून शतकी खेळी केली. दरम्यान हे दोघे बाद झाल्यानंतर देवदत्त पडिक्कल आणि सरफराज खानने मिळून संघासाठी महत्वपूर्ण खेळी केली. दोघांनी मिळून संघासाठी बहुमूल्य धावा जोडल्या.

भारतीय संघाने घेतली मोठी आघाडी..

इंग्लंडने केलेल्या २१८ धावांच्या प्रत्युत्तरात भारतीय संघाने दमदार सुरुवात केली. भारतीय संघाकडून रोहित शर्माने १०३ धावांची खेळी केली. तर शुभमन गिलने ११० धावा केल्या. यासह देवदत्त पडिक्कल, सरफराज खान आणि यशस्वी जयस्वाल यांनी अर्धशतकी खेळी करत भारतीय संघाची धावसंख्या ४०० पार पोहचवली. दुसऱ्या दिवसाखेर भारतीय संघाने २५५ धावांची आघाडी घेतली.