आयसीसी चॅम्पियन्स ट्रॉफीसाठी भारतीय टीम मॅनेजमेंट आणि कोच गौतम गंभीरने काही धाडसी निर्णय घेतला आहे. भारत आणि ऑस्ट्रेलिया यांच्यातील कसोटी मालिकेदरम्यान भारताचा वेगवान गोलंदाज जसप्रीत बुमराह दुखापतग्रस्त झाला होता.

त्यानंतर त्याला इंग्लंडविरुद्धच्या वनडे मालिकेसाठीही संधी दिली गेली नव्हती. त्याच्या जागी हर्षित राणाचा समावेश करण्यात आला आहे. मात्र बीसीसीआयने एक चूकीचा निर्णय घेतला आहे, जो चॅम्पियन्स ट्रॉफीत भारतीय संघाला महागात पडू शकतो.

जसप्रीत बुमराह स्पर्धेतून बाहेर पडल्यानंतर, हर्षित राणाचा संघात समावेश करण्यात आला. तर अनुभवी वेगवान गोलंदाज मोहम्मद सिराजला संघाबाहेर ठेवण्यात आला आहे. मोहम्मद सिराज, शिवम दुबे आणि यशस्वी जयस्वाल यांचा राखीव खेळाडू म्हणून समावेश करण्यात आला आहे. हे तिघेही आवश्यकता असल्यास दुबईला जातील.

या स्पर्धेचे यजमानपद पाकिस्तानकडे आहे, मात्र भारतीय संघाचे सामने दुबईत खेळवले जाणार आहेत. दुबईच्या मैदानांवरील रेकॉर्ड पाहिला, तर या मैदानावरील खेळपट्टीवर वेगवान गोलंदाजांना चांगलीच मदत मिळते. २००९ पासूनचा रेकॉर्ड पाहिला, तर या मैदानावर वेगवान गोलंदाजांनी गोलंदाजी करताना ४६६ गडी बाद केले आहेत. तर फिरकी गोलंदाजांना ३३४ गडी बाद करता आले आहेत.

माजी निवडकर्त्यांनी म्हटले की, ' दुबईतील खेळपट्टीवर फिरकी गोलंदाजांच्या तुलनेत वेगवान गोलंदाजांना अधिक मदत मिळते. त्यामुळेच पाकिस्तानने आपल्या संघात वेगवान गोलंदाजांना स्थान दिलं आहे. मात्र त्यांना इथे जास्त सामने खेळण्याची संधी मिळणार नाही. '

भारतीय संघाने या स्पर्धेसाठी फिरकी गोलंदाज रविंद्र जडेजा, अक्षर पटेल, वॉशिंग्टन सुंदर, कुलदीप यादव आणि वरुण चक्रवर्ती यांना संधी देण्यात आलं आहे. चॅम्पियन्स ट्रॉफी स्पर्धेत भारतीय संघाला बांग्लादेश, न्यूझीलंड आणि पाकिस्तानचा सामना करायचा आहे. या तिन्ही संघांनी वरुण चक्रवर्तीचा सामना केलेला नाही.

त्यामुळे त्याला संधी मिळणं निश्चित आहे. असं झाल्यास कुलदीप यादवला बाहेर बसावं लागेल. जसप्रीत बुमराहसारखा अनुभवी गोलंदाज बाहेर गेल्यानंतर मोहम्मद सिराजसारख्या अनुभवी गोलंदाजाला संधी मिळणं अपेक्षित होतं. मात्र असं काहीच झालेलं नाही. हर्षित राणाला संधी मिळणं, हे अनेकांना पटलेलं नाही.