चॅम्पियन्स ट्रॉफी २०२५ स्पर्धेसाठी भारतीय संघ पाकिस्तानात जाणार नाहीये, हे बीसीसीआयने स्पष्ट केलंय. मात्र तरीही पाकिस्तान क्रिकेट बोर्डला वाटतंय की, भारताने पाकिस्तानात यावं. चॅम्पियन्स ट्रॉफी स्पर्धा येत्या १९ फेब्रुवारी ते ९ मार्चदरम्यान रंगणार असल्याचं म्हटलं जात आहे.

मात्र याबाबत अधिकृत घोषणा करण्यात आलेली नाही. भारताने पाकिस्तानात जाण्यास नकार कळवला आहे. तसेच पाकिस्तानला ही स्पर्धा हायब्रिड मॉडेलमध्ये नकोय. त्यामुळे पाकिस्तानने जर या स्पर्धेचे यजमानपद सोडले, तर पाकिस्तानचं किती नुकसान होईल? जाणून घ्या.

पाकिस्तानने जर चॅम्पियन्स ट्रॉफीचं यजमानपद सोडलं, तर पाकिस्तानचं खूप मोठं नुकसान होणार आहे. पाकिस्तान क्रिकेट बोर्ड कर्जबाजारी झाल्याशिवाय राहणार नाही. १९९६ नंतर पाकिस्तान पहिल्यांदाच आयसीसीच्या स्पर्धेचे यजमानपद भूषविणार आहे. भारताने तर स्पष्ट नकार दिला आहे. यासह पाकिस्तान क्रिकेट बोर्डने बीसीसीआयचा हायब्रिड मॉडेलचा प्रस्ताव फेटाळून लावला आहे.

पाकिस्तानचं किती नुकसान होणार?

क्रिकबझच्या वृत्तानुसार, जर ही स्पर्धा पाकिस्तानऐवजी दुसऱ्या कुठल्या देशात खेळवली गेली, तर पाकिस्तानचं खूप मोठं नुकसान होणार आहे. जर स्पर्धेचे यजमानपद गेले तर पाकिस्तानला ६५ मिलियन अमेरिकन डॉलर्स म्हणजे ५४८ कोटी रुपयांचा फटका बसणार आहे.

या कारणामुळे वाढलं टेन्शन

पाकिस्तानला आणखी मोठा फटका बसणार आहे. कारण आयसीसी चॅम्पियन्स ट्रॉफी स्पर्धेचे यजमानपद मिळाल्यानंतर पीसीबीने रावळपिंडी आणि लाहोर स्टेडियमचं नूतनीकरण केलं. हा खर्चही आता पीसीबीच्या अंगाशी येणार आहे.

यापूर्वी देखील आशिया कप २०२३ स्पर्धेचे यजमानपद पाकिस्तानकडे होते. मात्र भारतीय संघाने पाकिस्तानात जाऊन खेळण्यास नकार दिला होता. त्यावेळीही बीसीसीआयने ही स्पर्धा हायब्रिड मॉडेलमध्ये खेळवण्याचा हट्ट केला होता. शेवटी पीसीबीला भारतासमोर झुकावं लागलं होतं. भारतीय संघाचे सामने श्रीलंकेत खेळवले गेले होते. या स्पर्धेत भारतीय संघाने एकतर्फी विजय मिळवला होता.