सेमीफायनलमध्ये जेमिमाच्या 127 धावांच्या खेळीच्या जोरावर टीम इंडियाने सात वेळा वर्ल्ड चॅम्पियन ऑस्ट्रेलियाचा पराभव करत फायनलमध्ये धडक मारली. आता वेळ होती फायनलची, तो दिवस उजाडला. संपूर्ण देशाचं भारताच्या लेकींच्या कामगिरीवर लक्ष होतं. क्रिकेटप्रेमींची पावलं नवी मुंबईच्या डी व्हाय पाटील स्टेडिअमकडे वळली. होम हवन करत महिला टीम इंडियाच्या विजयाची प्रार्थना करण्यात येत होती. पण पावसाने खोडा घातला आणि सामना उशीराने सुरु झाला.

पावसाच्या खेळीनंतर डी व्हाय पाटील स्टेडिअमवर हरमनप्रीतच्या महिला टीमचं वादळ घोंगावलं आणि यात दक्षिण आफ्रिकेची टीम पालापाचोळ्यासारखी उडून गेली. शेफाली वर्माची 87 धावांची फटकेबाजी, दिप्ती शर्माची 58 धावा आणि 5 विकेटची ऑलराऊंडर खेळी आणि याला मिळालेली हरमनप्रीतच्या चाणाक्ष निर्णयाची साथ या जोरावर टीम इंडियाने दक्षिण आफ्रिकेवर 52 धावांनी विजय मिळवला.

भारताच्या लेकींवर देशभरात कौतुकाचा वर्षाव होतोय, या ऐतिहासिक विजयामुळे देशाचं नाव उंचावलंय असं म्हणत सचिन तेंडुलकरने कौतुकाची थाप दिली. तर आभाळकडे पाहात रोहित शर्मा भाऊक झाल्याचं दिसलं. ऐतिहासिक विजयानंतर खेळाडूंना अश्रु अनावर झाले. हरमनप्रीत आणि स्मृती मंधाना एकमेकांना मिठी मारत प्रचंड भाऊक झाल्या. हरमनप्रीतने भांगडा करत जय शहांकडून ट्रॉफी स्विकारली आणि टीम इंडियाने अनोख्या स्टाईलने विजयाचा जल्लोष साजरा केला.

टीम इंडियाने याआधी 2005 आणि 2017 मध्ये अंतिम फेरीत प्रवेश केला होता. पण उपविजेत्यापदावरच समाधान मानावं लागलं होतं.ही कमी हरमनप्रीतने भरुन काढलीय.हा विजय केवळ क्रिकेट या खेळातला नव्हे तर सामाजिक परिवर्तनाला चालना देणारा विजय ठरणार आहे. जसा ८३च्या विजयानंतर देशातल्या घराघरात मुलांना क्रिकेटपटू करण्याचं स्वप्न पाहिलं गेलं.तसंच या विजयानंही आई-वडिलांना आपल्या मुलीच्या हातात बॅट देण्याचं मोठं स्पप्न दाखवलंय यात शंका नाही.