आगामी टी-२० वर्ल्डकप २०२४ स्पर्धा झाल्यानंतर भारताचे मुख्य प्रशिक्षक राहुल द्रविड यांचा मुख्यप्रशिक्षकपदाचा कार्यकाळ संपणार आहे. त्यामुळे पुढील मुख्यप्रशिक्षक कोण? याबाबत जोरदार चर्चा सुरु होती. या पदासाठी अनेक दिग्गज मंडळींची नावं समोर आली. अशामध्ये बीसीसीआयने भारताचा माजी क्रिकेटपटू गौतम गंभीरच्या नावावर शिक्कामोर्तब केल्याची माहिती समोर येत आहे. त्यामुले गौतम गंभीरचे नाव जवळपास निश्चित झाले आहे.

क्रिकबझने दिलेल्या वृत्तानुसार, बीसीसीआयने गौतम गंभीरची मुख्य प्रशिक्षक म्हणून निवड केली आहे. याबाबत लवकरच अधिकृत घोषणा केली जाणार आहे. नुकताच कोलकाता नाईट रायडर्सने आयपीएलची ट्रॉफी जिंकली. ही ट्रॉफी जिंकून देण्यात गौतम गंभीरने मोलाची भूमिका बजावली. त्याला या संघाच्या मेंटॉरची जबाबदारी देण्यात आली होती.

ही जबाबदारी त्याने योग्यरित्या पार पडली. दरम्यान फायनलचा सामना झाल्यानंतर बीसीसीआयचे सचिव जय शाह गौतम गंभीरसोबत चर्चा करताना दिसून आले होते. इथेच मुख्य प्रशिक्षक पदाबाबत चर्चा झाली असावी असा अंदाज व्यक्त केला जात आहे.

आगामी टी -२० वर्ल्डकप २०२४ स्पर्धा ही राहुल द्रविड यांची मुख्यप्रशिक्षक म्हणून शेवटची स्पर्धा असणार आहे. ही स्पर्धा झाल्यानंतर त्यांचा मुख्यप्रशिक्षकपदाचा कार्यकाळ संपणार आहे. बीसीसीआयने १३ मे रोजी गुगल फॉर्मद्वारे अर्ज मागवले होते. हे अर्ज दाखल करण्याची करण्याची शेवटची तारीख २७ मे होती.

या पदासाठी ३००० हून अधिक उमेदवारांनी अर्ज दाखल केला. ज्यात पंतप्रधान नरेंद्र मोदी, सचिन तेंडुलकर आणि एमएम धोनी यांच्या बनावटी अर्जांचा देखील समावेश होता. गौतम गंभीरने ही जबाबदारी स्वीकारल्यानंतर त्याचा कार्यकाळ हा १ जुलै २०२४ पासून ते २०२७ वनडे वर्ल्डकपपर्यंत असणार आहे.