लाखनमाजरा गावात एक मोठी आणि धक्कादायक घटना घडली आहे. यावेळी एका तरूणाचा मैदानात सराव करताना पोल तुटून पडल्याने मृत्यू झाला आहे. १७ वर्षीय हा तरूण राष्ट्रीय बास्केटबॉल खेळाडू होता. हार्दिक राठी असं त्याचं नाव होतं. हार्दिक राठीने तीन सब-ज्युनियर नॅशनल आणि एक युथ नॅशनल स्पर्धेत भाग घेतला होता. तसंच बास्केटबॉल फेडरेशन ऑफ इंडिया यांच्या इंदूर अकादमीसाठी त्याची निवड झाली होती.

अकॅडमीतून त्याला सरावासाठी फोन करून बोलावण्यात येत होतं. मात्र सध्या तो गावातच सराव करत होता. मंगळवारी सकाळी साडेदहा वाजता हार्दिक मैदानात सराव करत होता. त्यावेळी टीतील इतर सदस्य बाजूला काही वेळ आराम करत होते.

कसा घडला अपघात?

बास्केटबॉलच्या पोलवर उडी मारून प्रॅक्टिस करताना अचानक तो पोल हार्दिकवर कोसळला. जवळच बसलेले खेळाडू काही सेकंदांतच त्याला पोलखालून बाहेर काढून उपचारासाठी रुग्णालयात घेऊन गेले, मात्र डॉक्टरांनी त्याला मृत घोषित केलं.

या घटनेची माहिती पोलिसांना देण्यात आली. लाखनमाजरा पोलीस ठाण्याचे अधिकारी तात्काळ घटनास्थळी पोहोचले. पोलिसांनी कुटुंबीयांच्या निवेदनावर कारवाई करत मृतदेहाचं पोस्टमार्टम करून ते कुटुंबीयांच्या ताब्यात दिलंय.

सीसीटीव्ही फुटेजमध्ये घटना कैद

पोलिसांच्या माहितीनुसार, लाखनमाजरा गावातील संदीप यांची दोन मुलगे आहेत. त्यांचा मोठा मुलगा 17 वर्षीय हार्दिक राष्ट्रीय स्तरावरील बास्केटबॉल खेळाडू होता. हार्दिकच्या मृत्यूची संपूर्ण घटना मैदानात लावलेल्या सीसीटीव्ही कॅमेऱ्यात कैद झाली आहे

फुटेजनुसार, हार्दिक मैदानात सराव करत होता. वर उडी मारताना अचानक पोल त्याच्यावर कोसळला. त्याच वेळी जवळ बसलेल्या खेळाडूंनी पोल उचलून त्याला बाहेर काढलं. यावेळी त्यांनी तातडीने त्याला रूग्णालयात दाखल केलं. मात्र रुग्णालयात नेल्यावर डॉक्टरांनी त्याला मृत घोषित केलं. या घटनेनंतर गावात आणि क्रीडा क्षेत्रात शोककळा पसरली आहे.