ऑस्ट्रेलियाची दिग्गज महिला क्रिकेटपटू एलिसा हिलीने एकदिवसीय क्रिकेटमधून निवृत्ती घेतली आहे. तिने १ मार्च रोजी भारताविरुद्ध तिचा शेवटचा सामना खेळला. तिच्या निवृत्तीच्या सामन्यात एलिसा हिलीने १५८ धावांची शतकी खेळी केली. यामुळे कांगारू संघाला भारतावर १८५ धावांचा मोठा विजय मिळवून देण्यात मदत झाली.

ऑस्ट्रेलियन क्रिकेट संघाची कर्णधार एलिसा हिलीने एकदिवसीय क्रिकेटमधून निवृत्ती घेतली आहे. भारताविरुद्धच्या एकदिवसीय मालिकेच्या समाप्तीनंतर या फॉरमॅटमधून निवृत्ती घेणार असल्याची घोषणा तिने जानेवारीमध्ये केली होती. दरमयान भारताने टी२० सीरीजमध्ये ऑस्ट्रेलियाला २-१ अशा पद्धतीने पराभूत केलं. त्यानंतर ऑस्ट्रेलियाने तीन सामन्यांची एकदिवसीय मालिका ३-० अशी जिंकली.

आता दोन्ही संघांमधील कसोटी सामना ६ मार्च रोजी सुरू होणार आहे. हा अ‍ॅलिसा हिलीचा शेवटचा आंतरराष्ट्रीय सामना असणार आहे. एलिसा हिलीने आपल्या एकदिवसीय कारकिर्दीत १२६ सामने खेळले आहेत. यात ३,७७७ धावा केल्या आहेत. तिने आठ शतके आणि १९ अर्धशतके केली आहेत. या फॉरमॅटमध्ये विकेटकीपर म्हणून तिने ८५ झेल घेतले आणि ३८ स्टंपिंग केल्या आहेत.

१८५ धावांनी जिंकला सामना

तिसऱ्या एकदिवशी सामन्यात ऑस्ट्रेलियाच्या संघाने प्रथम फलंदाजी करताना ४०९ धावांचे आव्हान दिले होते. या सामन्यात एलिसा हिलीने १५८ धावा केल्या. बेथ मूनी सोबत तिने १४५ धावांची भागीदारी केली होती. हिलीने तिच्या डावात २७ चौकार आणि दोन षटकार मारले. ४१० धावांच्या लक्ष्याचा पाठलाग करताना टीम इंडिया २२४ धावांवर ऑलआउट झाली.

एकाही भारतीय फलंदाजाला लक्षणीय खेळी करता आली नाही. स्मृती मानधना शून्यावर बाद झाली. जेमिमा रॉड्रिग्जने ४२ आणि स्नेह राणानेही ४४ धावा केल्या. परंतु नियमित अंतराने विकेट पडत राहिल्याने टीम इंडिया ४५.१ षटकांत २२४ धावांवर ऑल आऊट झाली.