India vs Netherlands : नेदरलँडविरुद्धच्या सामन्यात जगातील क्रमांक एकचा फलंदाज अभिषेक शर्मा शून्यावर बाद झाला. सलग तीन सामन्यांत त्याला खातंही उघडता आलं नाही. टी २० वर्ल्डकपमध्ये जगातील क्रमांक एकच्या फलंदाजाला अद्याप एकही धाव करता आली नाही आणि सलग तिसऱ्यांदा शून्यावर बाद होण्याचा नकोसा विक्रम त्यानं आपल्या नावावर केला.

नेदरलँडच्या विरोधात अभिषेक शर्मा खराब फटका मारून बाद झाला. आर्यन दत्तच्या गोलंदाजीवर पूल शॉट मारण्याच्या प्रयत्नात तो चुकला आणि त्रिफळा उडाला. विशेष म्हणजे यावेळी अभिषेक मैदानात फलंदाजीला उतरला त्यावेळी त्यानं स्वतःची जर्सी घातली नव्हती. अभिषेकनं मोहम्मद सिराजची जर्सी घातली होती. पण नशिबानं त्याला साथ दिली नाही. धावांचा 'अभिषेक' त्याला घालता आला नाही.

अभिषेक शर्मा हा मोहम्मद सिराजची जर्सी घालून मैदानात फलंदाजीला उतरला. सलग दोन सामन्यांत शून्यावर बाद झाल्यानंतर गुडलकसाठी सिराजची जर्सी घालून तो मैदानात आला. पण अभिषेकला पुन्हा खातं उघडता आलं नाही. जर्सी बदलून धावा करता येत नाहीत, तर चांगले फटके मारून धावा करता येतात, अशा प्रतिक्रिया आता सोशल मीडियावर क्रिकेट चाहत्यांकडून व्यक्त होत आहेत.

अभिषेक शर्मा या टी २० वर्ल्डकपमध्ये आतापर्यंत चांगली कामगिरी करू शकला नाही. मैदानात फलंदाजीला आल्यानंतर तो खराब फटके मारून लागलीच तंबूत परततो. या स्पर्धेत आतापर्यंत तो ८ चेंडू खेळला आहे. यूएसएविरुद्ध तो पहिल्याच चेंडूवर बाद झालाय. पाकिस्तानविरुद्ध चार चेंडू खेळला आणि बाद झाला. तर नेदरलँडविरुद्ध तीन चेंडू खेळून तो माघारी परतला. शर्मा गेल्या सात डावांमध्ये पाच वेळा शून्यावर बाद झाला आहे. त्याचा खराब फॉर्म भारतीय संघासाठी चिंताजनक ठरत आहे.