मराठी माणसाला आपटून आपटून मारण्याची भाषा करणाऱ्या भाजपच्या निशिकांत दुबे यांना राज्यातील महिला खासदारांनी आपला इंगा दाखवलया. बुधवारी संसदेचे कामकाज संपल्यानंतर लॉबीमध्ये दुबेंना खिंडीत पकड महिला खासदारांनी जाब विचारला. त्यांच्यापुढे जय महाराष्ट्र अशा घोषणा दिल्या. आपटून आपटून कुणाला मारणार? असा सवाल दुबेंना महिला खासदारांनी विचारला. महाराष्ट्राच्या महिला खासदारांचा रोष पाहून दुबेंनी संसदेतून काहीही उत्तर न देता काढता पाय घेतला. दुबेंची झालेली गोची सध्या सोशल मीडियावर चर्चेचा विषय आहे.

मराठी आणि हिंदीच्या मुद्द्यावर महाराष्ट्रातील राजकारण तापले आहे. त्यातच भाजपचे खासदार निशिकांत दुबे यांनी तेल ओतण्याचे काम करत हा मुद्दा राष्ट्रीय पातळीवर नेला. मराठी माणसाला डिवचत वादग्रस्त वक्तव्य केले. राज ठाकरेंनी आपल्या सभेतून दुबेंना इशारा दिलाच होता. आता राज्यातील महिला खासदारांनी खिंडीत पकड मराठमोळा इंगा दाखवला. मराठी खासदारांचा रोष पाहून दुबेंनी काढता पाय घेतला. त्याआधी आप तो मेरी बहन है, असं म्हणत दुबे हात जोडून तिकडून निघून गेले.

काँग्रेसच्या खासदार वर्षा गायकवाड, शोभा बच्छाव, प्रतिभा धानोरकर यांनी भाजप खासदार दुबे यांना संसेदत गाठलं. दुबेंना तिघींनी घेराव घातला आणि मराठीबाबतच्या विधानांबाबत जाब विचारला. काँग्रेसच्या खासदार वर्षा गायकवाड यांनी दुबे यांना जाब विचारताना म्हटले की, "मराठी लोकांना मारण्याची भाषा तुम्ही कशी करू शकता? आपटून आपटून तुम्ही कुणाला मारणार आहात? ही कसली तुमची अर्वाच्च भाषा ? तुमचे वागणे-बोलणे योग्य नाही. मराठी माणसाबद्दलची आरेरावी खपवून घेतली जाणार नाही. " मराठी खासदारांचा रोष पाहून दुबे गोंधळून गेले अन् संसदेतून काढता पाय काढला. पण ते जाताना महिला खासदारांनी जय महाराष्ट्र अशी घोषणाबाजी केली.