लोकसभा निवडणुकीत इंडिया आघाडीने २३४ जागा जिंकत जोरदार मुसंडी मारली. मात्र, त्यांना बहुतमाचा आकडा गाठता आला नाही. दुसरीकडे भाजप प्रणित राष्ट्रीय लोकशाही आघाडीने (NDA) २९३ जागांवर विजय मिळवत बहुमताचा आकडा पार केला. त्यामुळे देशात पुन्हा एकदा एनडीएचं सरकार स्थापन होणार आहे. आज सायंकाळी नरेंद्र मोदी तिसऱ्यांदा पंतप्रधानपदाची शपथ घेणार आहेत.

त्यांच्या शपथविधीआधी पश्चिम बंगालच्या मुख्यमंत्री ममता बॅनर्जी यांनी मोठं विधान केलं आहे. सरकारं कधीकधी एक दिवस पण टिकतात. आम्ही वेट अँड वॉचच्या भूमिकेत आहोत. कमकुवत आणि स्थिर भाजपच्या नेतृत्वाखालील एनडीए सरकारला सत्तेतून बाहेर काढल्यास आनंद होईल, असं ममता यांनी म्हटलं आहे.

ममता बॅनर्जी यांनी तृणमूल काँग्रेसच्या नवनिर्वाचित खासदारांशी चर्चा केली. यानंतर त्यांनी माध्यमांसोबत संवाद साधला. यावेळी नरेंद्र मोदी यांच्या शपथविधी सोहळ्याला उपस्थित राहणार की नाही? असा प्रश्न पत्रकारांनी ममता यांना विचारला. तेव्हा, आपण शपथविधीला जाणार नसल्याचं ममता यांनी स्पष्ट केलं.

'एनडीए' सरकार फार काळ टिकणार नाही, असा मोठा दावा ममता बॅनर्जी यांनी केला. आज देशाला बदल हवा आहे. हा जनाधार परिवर्तनासाठी होता. त्यांना सरकार स्थापन करू द्या, आम्ही वाट पाहतोय. 'इंडिया' आघाडीनं सत्ता स्थापनेचा दावा केलेला नाही. याचा अर्थ भविष्यात आम्ही तसे करणार नाही, असंही ममता म्हणाल्या.

ममता बॅनर्जी यांनी CAA वरून भाजपवर निशाणा साधला. त्या म्हणाल्या की, "CAA रद्द करावा लागेल. ही मागणी आम्ही संसदेत मांडणार आहोत. मला माफ करा, पण मी असंवैधानिक, बेकायदेशीर पक्षाला सरकार स्थापन करण्यासाठी शुभेच्छा देऊ शकत नाही. माझ्या शुभेच्छा देशासाठी असतील, मी सर्व खासदारांना सांगेन की, पक्ष मजबूत करा".