चेन्नई: तामिळनाडूमधील सलेम जिल्ह्यातील भीषण अपघाताचा व्हिडिओ सोशल मीडियावर व्हायरल झाला आहे. दोन बस एकमेकींना धडकल्या. या अपघातात ३० प्रवासी जखमी झाले आहेत. या भीषण अपघाताचा व्हिडिओ व्हायरल झाला आहे. अपघातग्रस्त बसमध्ये लावलेल्या सीसीटीव्ही फुटेजमध्ये ही घटना कैद झाली आहे. व्हायरल झालेला व्हिडिओ काळजाचा ठोका चुकवणारा आहे. हा अपघात मंगळवारी, १७ मे रोजी संध्याकाळी झाल्याचे समजते. एडप्पादीहून ३० प्रवाशांना घेऊन जाणारी खासगी बस तिरुचेंगोडे येथून येत होती. ती अन्य एका खासगी बसला जोरदार धडकली.

सीसीटीव्ही फुटेजमध्ये या भीषण अपघाताची घटना कैद झाली आहे. बसची धडक होताच चालक आपल्या सीटवरून फेकला गेल्याचे फुटेजमध्ये दिसते. बसच्या पुढच्या भागाचा चक्काचूर झाल्याचेही यात दिसते. या बस अपघातात ३० प्रवासी जखमी झाले आहेत. त्यांच्यावर रुग्णालयात उपचार सुरू असल्याचे सांगण्यात येत आहे.

मिळालेल्या माहितीनुसार, विरुद्ध दिशेकडील मार्गिकेवर भरधाव खासगी बस गेली. ती अन्य एका खासगी बसला धडकली. धडक इतकी जोरदार होती की, बसमधील काही प्रवासी विंड स्क्रीनवर येऊन पडले. चालक मार्गिकेवरून आरामात बस नेत होता, त्याचवेळी समोरून आलेली एक बस विरुद्ध दिशेकडील मार्गिकेवर येऊन जोरात धडकताना या फुटेजमध्ये दिसत आहे. या धडकेत चालक, वाहक आणि बसमधील प्रवासी विंड शीटवर आदळल्याचे दिसते. काचा फुटून त्या चालकाला लागल्याचेही या व्हिडिओत दिसते.