उत्तरप्रदेशातील कानपूरमधून एक भयानक घटना समोर आली आहे. शनिवारी दुपारी एका महिला स्टेनोने कोर्ट कॉम्प्लेक्सच्या सहाव्या मजल्यावरून उडी मारली. सहाव्या मजल्यावरून उडी मारल्यामुळे तरूणीचा जागीच मृत्यू झाला. तरूणीनं आत्महत्या केल्यानंतर न्यायालयात खळबळ उडाली. घटनेची माहिती मिळताच पोलीस घटनास्थळी पोहोचले. त्यांनी मृतदेह ताब्यात घेतला, तसेच तपासाला सुरूवात केली. तरूणीनं आत्महत्या का केली? याचा तपास पोलिसांकडून सुरू आहे.

ही धक्कादायक घटना कोतवाली परिसरातील कोर्ट कॉम्प्लेक्समध्ये घडली. महिला स्टेनोने सहाव्या मजल्यावरून उडी मारून आत्महत्या केली. या घटनेनंतर पोलीस आयुक्त स्वत: घटनास्थळी पोहोचले. पोलीस अधिकाऱ्यांनी घटनास्थळाची कसून तपासणी केली. तसेच प्रत्यक्षदर्शींकडून माहिती गोळा केली. पोलिसांकडून सीसीटीव्ही देखील तपासले जात आहे.

मिळालेल्या माहितीनुसार, फॉरेन्सिक टीमने घटनास्थळावरून पुरावे गोळा केले आहेत. नेहा शंखवार (वय वर्ष ३०) असे मृत तरूणीचे नाव असून, ती सिव्हिल कोर्ट सीनिअर डिव्हिजन चीफ जस्टिसच्या कोर्टात स्टेनो होती. पोलिसांनी मृतदेह ताब्यात घेतला असून, शवविच्छेदनासाठी रूग्णालयात पाठवला आहे. दुसरीकडे मृताच्या आजोबांनी कोर्टात तैनात कर्माचाऱ्यांवर तिचा छळ केल्याचा गंभीर आरोप केला आहे. तणावाखाली येऊन तिनं आयुष्य संपवलं असल्याचं सांगितलं.

महिला स्टेनोच्या मृत्यूबाबत तिच्या कुटुंबाला माहिती देण्यात आली. मिळालेल्या माहितीनुसार, नेहा कोटरा मकरंदपूर येथील रहिवासी होती. ती बारा बायपासवर असलेल्या शनिदेव मंदिराजवळ भाड्याच्या खोलीत राहत होती. नेहाच्या मृत्यूची बातमी कळताच शंखवार कुटुंबावर दुखा:चा डोंगर कोसळला आहे. नेहानं आत्महत्या का केली? याचा तपास पोलिसांकडून सुरू आहे.