Uttarakhand Tunnel Accident Update

उत्तरकाशीतील सिलक्यारा बोगद्यात अडकलेल्या ४१ कामगारांना वाचवण्याचे काम गेल्या १४ दिवसांपासून अविरत सुरू आहे. मात्र बचावकार्यात पदोपदी अडथळे निर्माण होत असल्यामुळे अद्याप कामगारांपर्यंत पोहोचता आलेलं नाही. दरम्यान शेवटचे वृत्त हाती आले त्यावेळी सिल्क ११ बोगद्यात ड्रिलिंगदरम्यान मशीनचे ब्लेड लोखंडी सळ्यांच्या जाळ्यात अडकून पडले, त्यामुळे ऑगर मशीनद्वारे काम करणे मुश्किल बनले असून शुक्रवारी सायंकाळी पुन्हा बचाव मोहीम थांबवण्यात आली.

शुक्रवारी सायंकाळी ड्रिलिंगदरम्यान लोखंडी सळ्याचं जाळं मशीनसमोर आलं, त्यामुळे ऑगर मशीनचे ब्लेड या सळ्य़ांच्या जाळ्यात अडकले. मशीनचा समोरिल भाग लोखंडी पाईपमध्ये अडकून पडला. बचाव मोहीम सुरू झाल्यापासून या मशीनला आलेली ही आतार्यंतची सर्वात मोठी अडचण आहे. लोखंडी सळ्यांच्या जाळ्यात अडकलेले ब्लेड काढण्यासाठी अनेक अडचणींचा सामना करावा लागत आहे. सध्या मशीन बाहेर काढण्यासाठी लोखंडी जाळं कापल्याशिवाय बचाव पथकांसमोर कोणताही दुसरा मार्ग नाही.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

लोखंडी पाईप दरडीखालून घालण्याची क्षमता मशीनमध्ये आहे मात्र, लोखंडी सळ्या मार्गात आल्यामुळे हा पर्यायही आता बंद झाला आहे. काही वेळानंतर मोठी बैठक होणार असून या बैठकीत व्हर्टिकल ड्रिलिंग सुरू करण्याचा निर्णय घेतला जाण्याची शक़्यता आहे. दरम्यान ओएनजीसी, एसजीव्हीएनएल व्हर्टिकल ड्रिलिंग करण्याच्या तयारीत असल्याची माहिती मिळाली आहे. यासाठी लागणाऱ्या मशीन जोडण्यात आल्या आहेत. ट्रकची मजबुती तपासल्यानंतर साहित्य ड्रिलिंगच्या ठिकाणी पोहोचवलं जाईल. सध्या यासंदर्भात बैठक सुरू आहे.