महिलेने गोंडस बाळाला जन्म देऊन तीन दिवस झाले होते. संपूर्ण कुटुंब आनंदात होतं. रुग्णालयातून डिस्चार्ज मिळाल्यानंतर कुटुंब बाळासहित कारने घरी निघालं. मात्र, घरी परतताना काळाने कुटुंबावर घाला घातला. भीषण अपघातात तीन दिवसांच्या बाळासह ४ जणांचा जागीच मृत्यू झाला आहे.

मिळालेल्या माहितीनुसार, उत्तराखंडच्या हल्द्वानी येथील सुशीला तिवारी रुग्णालयात महिलेने गोंडस बाळाला जन्म दिला. रुग्णालयातून डिस्चार्ज मिळाल्यानंतर महिला कुटुंबासह कच्छा येथे निघाली. मात्र, कच्छाला जाणाऱ्या कुटुंबाची कार कालव्यात कोसळली. बाजार समितीसमोरील कालव्यात बुधवारी सात वाजता ही कार कोसळली. या दुर्देवी घटनेत चार जणांचा मृत्यू झाला. तर दोन जण गंभीर जखमी झाले.

अपघातात आईचा जीव वाचला आहे. परंतु तीन दिवसांच्या चिमुकल्याचा दुर्दैवी अंत झाला. या घटनेत बाळाच्या वडिलांचाही मृत्यू झाला. भीषण अपघातात एकाच कुटुंबातील चौघांचा मृत्यू झाला. अपघाताची घटना घडल्यानंतर तातडीने अग्निशमन दलाच्या विभागाने रेस्क्यू अभियान राबवण्यास सुरुवात केलं. अभियान राबवताना अग्निशमन विभागाचा कर्मचारी कालव्यात वाहून जात होता. मात्र, त्याने जीवाची बाजून लावून स्वत:चा जीव वाचवला. तसेत कारमधील चालकाचाही जीव वाचवला.

हिंगोलीत भीषण अपघात; दोघांचे पाय निकामी

हिंगोली शहरातील एनटीसी परिसरात पिकप वाहन आणि दुचाकी अपघातात दोघांनी पाय गमावल्याची घटना घडली. जिल्हा सरकारी कामगार कार्यालयाच्या परिसरात दुचाकीवरून जाणाऱ्या दोघांना पिकप आणि वाहनाने कट मारल्याने अपघात घडला. दुचाकी सिमेंट रस्त्याच्या बाजूला असलेल्या नाल्यात कोसळल्याने दुचाकीवरील दोघांच्या पायाला गंभीर दुखापत झाली. या घटनेनंतर हिंगोली शहर पोलिसांनी तातडीने घटनास्थळी दाखल होत दोन्ही वाहने ताब्यात घेतली. तसेच पोलिसांनी जखमींना हिंगोलीच्या शासकीय रुग्णालयात उपचारासाठी भरती केले होते.