Uttar Pradesh Meerut Bulandshahr Accident उत्तर प्रदेशातील बुलंदशहर जिल्ह्यातील मेरठ-बुलंदशहर राष्ट्रीय महामार्ग ३३४ वर एक भीषण अपघात घडला. एका भरधाव वेगाने येणाऱ्या क्रेटा कारने डिव्हायडर तोडून समोरून येणाऱ्या ट्रकला धडक दिली.ही धडक इतकी भीषण होती की, कारमधील तीन जणांचा जागीच मृत्यू झाला. सदर अपघात सोमवारी रात्री घडला आहे. मेरठचे रहिवासी डॉ. आशुतोष पुनिया, त्यांचे पीएसओ महेश आणि मेरठ रुग्णालयाच्या मालकाचा मुलगा अंकित त्यागी अशी अपघातात मृत झालेल्या प्रवाशांची नावे आहेत.

मिळलेल्या माहितीनुसार, अपघातावेळी त्यांच्याकडे सापडलेल्या कागदपत्रांवरून तिन्ही मृतांची ओळख पटवण्यात आली आहे. मृतांच्या कुटुंबियांना अपघाताची माहिती देण्यात आली आहे. या घटनेत नुकसान झालेले वाहन राष्ट्रीय महामार्ग ३३४ वरून हटवण्यात आले आहे आणि वाहतूक सुरळीत सुरू झाली आहे. डॉ. आशुतोष पुनिया हे त्यांच्या पीएसओसोबत बुलंदशहरहून मेरठला परतत होते. गुलाओठी पोलिस स्टेशन हद्दीतील छप्रावत गावाजवळ हा अपघात झाला.

घटनास्थळी असलेल्या लोकांनी सांगितले, कार इतक्या वेगाने जात होती की तिचे नियंत्रण सुटले, तीन ते चार वेळा उलटली आणि ती डिव्हायडरच्या दुसऱ्या बाजूला गेली. अपघात इतका भीषण होता की, या दुर्घटनेत कारचा चेंदामेंदा झाला आहे. अपघात घडताच नागरिकांनी घटनास्थळी धाव घेत बचाव कार्य सुरु केलं. मात्र प्रवाशांना बाहेर काढेपर्यंत त्यांचा मृत्यू झाला होता.

माहिती मिळताच वरिष्ठ पोलिस अधीक्षक (एसएसपी) घटनास्थळी पोहोचले आणि त्यांनी घटनास्थळाची पाहणी केली. पोलिसांनी तिन्ही मृतदेह ताब्यात घेतले असून शवविच्छेदनासाठी पाठवले आहेत. मिळालेल्या वृत्तानुसार, डॉ. आशुतोष पुनिया आणि अंकित त्यागी हे सरधना पोलिस स्टेशन परिसरातील दालमपूर गावातील रहिवासी होते, तर पीएसओ महेश बुलंदशहर जिल्ह्यातील होते. पोलिस आता या प्रकरणाचा तपास करत आहेत.