उत्तर प्रदेशच्या मुजफ्फरनगरमध्ये सोमवारी रात्री भीषण अपघात झाला. पुरकाजी पोलीस ठाण्याच्या हद्दीतील लक्सर रोडवर भरधाव डंपरने कारला जोरदार धडक दिली. या अपघातात कारमधील ४ जणांचा मृत्यू झाला असून, ३ जण गंभीर जखमी झाले आहेत. जखमींवर रुग्णालयात उपचार सुरू आहेत. तसेच पोलीस या घटनेचा पुढील तपास करत आहेत.

मिळालेल्या माहितीनुसार, सोमवारी रात्री सुमारे १०.१५ वाजण्याच्या सुमारास हा अपघात झाला. लक्सरच्या दिशेने एक कार जात होती. याचवेळी समोरून येणाऱ्या डंपरने कारला बाजूने जोरदार धडक दिली. धडकेनंतर कारचा अक्षरशः चक्काचूर झाला. वाहनातील प्रवासी त्यात अडकून पडले होते. अपघाताची माहिती मिळताच पोलिसांचे पथक घटनास्थळी दाखल झाले. वाहनात अडकलेल्या नागरिकांना बाहेर काढण्यासाठी हायड्राच्या मदतीने बचावकार्य करण्यात आले. त्यानंतर सर्व जखमींना तातडीने रुग्णालयात दाखल करण्यात आले. मात्र, उपचारादरम्यान आणखी दोघांचा मृत्यू झाला.

या कारमधून एकूण सात जण प्रवास करत होते. यामध्ये चालक आदेश कुमार आणि निशा यांचा घटनास्थळीच मृत्यू झाला. तर राखी, गोनी, कुसुम, रूबी आणि वैष्णवी हे जखमी झाले होते. उपचारादरम्यान निशा आणि गोनी यांचाही मृत्यू झाल्याने मृतांचा आकडा चारवर पोहोचला. सध्या तीन जखमींवर उपचार सुरू आहेत.

घटनेची गंभीरता लक्षात घेऊन वरिष्ठ पोलीस अधिकारीही घटनास्थळी पोचले. वरिष्ठ पोलीस अधीक्षक संजय कुमार वर्मा, एसपी सिटी अमृत जैन, एसपी ट्रॅफिक अतुल कुमार चौबे आणि क्षेत्राधिकारी सदर सुनील कुमार यांनी घटनास्थळाची पाहणी केली. बचावकार्याची माहिती घेत त्यांनी जखमींना योग्य उपचार मिळावेत, अशा सूचना अधिकाऱ्यांना दिल्या. दरम्यान, पोलिसांनी अपघातग्रस्त डंपर आणि त्याच्या चालकाला ताब्यात घेतले आहे. मृतक आणि जखमींच्या कुटुंबीयांना घटनेची माहिती देण्यात आली असून, या प्रकरणी पुढील कायदेशीर कारवाई सुरू आहे.