Pratapgarh Road Accident News: उत्तरप्रदेशमधून एक भीषण अपघाताची घटना समोर आली आहे. दुचाकीस्वाराला वाचवण्याच्या नादात एका टँकर आणि प्रवाशांनी भरलेल्या टेम्पोमध्ये हा भीषण अपघात झाला असून यामध्ये ९ जणांचा जागीच मृत्यू झाला. या दुर्देवी घटनेने परिसरात एकच खळबळ उडाली असून अपघातात जखमींवर रुग्णालयात उपचार सुरू आहेत.

याबाबत अधिक माहिती अशी की, खापलनगर ते मोहनगंज जवळ लालगंजकडून गॅसचा टँकर येत होता. तर प्रतापगडकडून एक टेम्पो जेठवाड्याकडे जात होता. यावेळी रायबरेली-जौनपूर महामार्गावर रायजू विक्रमपूरजवळ दुचाकीस्वाराला वाचवण्याच्या प्रयत्नात टँकर आणि टेम्पोमध्ये भीषण धडक झाली. या धडकेनंतर टेम्पो पलटी झाला.

ही धडक इतकी भीषण (Accident) होती की टेम्पोमधील 16 जणांपैकी सात जणांचा जागीच मृत्यू झाला. तर दोघांचा रुग्णालयात उपचारादरम्यान मृत्यू झाला. या धक्कादायक घटनेने परिसरात एकच खळबळ उडाली होती. यावेळी स्थानिकांनी मदत करत अपघातातील जखमींना रुग्णालयात दाखल केले.

या अपघाताची माहिती मिळताच एसडीएम सदर, सीओ सिटी, सीआय लालगंज घटनास्थळी पोहोचले. टँकरमध्ये गॅस गळती झाल्याची माहिती मिळताच अग्निशमन दलाला पाचारण करण्यात आले. तसेच टॅंकरवर पाणी टाकून आग विझवण्यात आली.

मृतांच्या नातेवाईकांना २ लाखांची मदत जाहीर...

दरम्यान, मुख्यमंत्री योगी आदित्यनाथ यांनी या अपघाताची दखल घेतली आहे. अधिकाऱ्यांना तातडीने घटनास्थळी पोहोचण्याच्या सूचना देण्यात आल्या आहेत. मृतांना 2 लाख रुपयांची आर्थिक मदत जाहीर करण्यात आली आहे. त्याचबरोबर जखमींच्या उपचारासाठी 50 हजार देण्याची घोषणा करण्यात आली आहे. (Latest Marathi News)